8. vika 2017.

Íbúafundur um sameiningarmál.

Í vikunni voru íbúar boðaðir til fundar vegna úttektar á kostum og göllum sameiningar sveitarfélaganna Garðs og Sandgerðisbæjar. Mjög góð mæting var á fundinum og virk þátttaka yfir 100 íbúa sem mættu. Verkefnið heldur nú áfram og er mikið verk að vinna úr öllum þeim gögnum og upplýsingum sem safnað hefur verið saman, þar á meðal fjölmörgum ábendingum og sjónarmiðum sem fram hafa komið frá íbúunum. Kærar þakkir garðbúar fyrir virka þátttöku og áhuga á þessu verkefni. Hér að neðan eru myndir frá íbúafundinum.

Íbúafundur um sameiningu 220217

íbúafundur 220217

Bæjarráð.

Í gær, fimmtudag var fundur í bæjarráði. Margvísleg mál voru þar á dagskrá, að vanda. Meðal þeirra má nefna að samþykktur var samningur við Víði um stuðning sveitarfélagsins við tiltekna þætti í starfsemi félagsins, auk þess að samþykktur var styrkur til félagsins vegna mikils ferðakostnaðar á komandi sumri. Þá má nefna að samþykkt var að eiga samstarf við Sjónvarp Víkurfrétta, sem felur í sér stuðning sveitarfélagsins við þáttagerð og fréttaflutning af Suðurnesjum.

Margt um að vera í leikskólanum.

Það er jafnan mikið um að vera í leikskólanum og margt skemmtilegt sem þar er tekið upp á. Nú í vikunni var skiptimarkaður, þar sem foreldrar komu m.a. með fatnað sem börnin hafa vaxið upp úr en er óslitinn og vel nýtilegur fyrir minni börnin. Þetta er frábær hugmynd sem miðar að endurnýtingu og minni sóun. Í dag, föstudag er „Öfugsnúinn dagur“, þar sem öllu á að snúa á hvolf. Gaman að fylgjast með fjölbreyttu og líflegu starfi hjá leikskólanum.

Norðurljósaparadísin Garðskagi.

Nú í gærkvöldi, fimmtudag, voru góð skilyrði á Garðskaga til að sjá norðuljósin dansa á himni. Fjöldi fólks var á ferðinni til að njóta. Á svona kvöldum eru nánast öll ljós á Garðskaga slökkt, nema að sjálfsögðu vitaljósið í sjálfum Garðskagavita. Það skapar enn betri skilyrði til að sjá og njóta norðurljósanna. Myndina hér að neðan tók Kjartan Guðmundur Júlíusson í gærkvöldi.

Garðskagi 23.feb 2017

Félagsmiðstöðin Eldingin.  

Mikið er jafnan um að vera í félagsmiðstöðinni. Í vikunni var haldið diskó þar sem þemað var „brjálað hár“ og mættu krakkar í 1. – 7. bekk og skemmtu sér við leiki og dans. Myndin hér að neðan er frá diskóinu og ber með sér stemmninguna hjá krökkunum.

Eldingin.ruglað hár

Víðir.

Meistaraflokkur Víðis í knattspyrnu undirbýr sig af miklum krafti fyrir komandi sumar. Um síðustu helgi vann Víðir góðan sigur á grönnum sínum Þrótti í Vogum 4-2 í Fótbolti.net mótinu, en síðan tapaði Víðir úrslitaleik mótsins gegn Kára á Akranesi 4-1. Víðisliðið er á góðu róli í sínum undirbúningi, enda mikil tilhlökkun fyrir komandi íslandsmóti.

Unglingaráð Víðis og Reynis hafa átt gott samstarf um yngri flokka félaganna og nú hefur nýtt, öflugt og áhugasamt fólk komið inn í starf Unglingaráðs fyrir hönd Víðis. Það hefur verið ánægjulegt að fylgjast með þessu jákvæða og góða samstarfi félaganna, sem hefur gengið vel og almenn ánægja ríkir um.  Aðalfundur Víðis verður mánudaginn 27. febrúar í Víðishúsinu og hefst kl. 20:00.  Áfram Víðir !

Sól hækkar á lofti.

Allt í einu er febrúar að renna sitt skeið á enda og mars að taka við. Tíminn flýgur hratt, sem felur í sér að sól hækkar hratt á lofti. Daginn er farið að lengja verulega og óðum styttist í vorið. Veðurfarið hefur ekki verið í beinum takti við dagatalið undanfarnar vikur og mánuði, því flesta daga hefur verið nánast vorveður, með ekki mörgum undantekningum. Fyrr en varir verður komið vor og vonandi gott sumar í kjölfarið.

Veðrið.

Það hefur verið létt sveifla á veðrinu þessa vikuna. Flesta daga hafa verið suðlægar áttir með hlýindum og oft rigningu. Á miðvikudaginn snjóaði létt en þann snjó tók fljótt upp. Í gær fimmtudag snjóaði, eins og myndin frá Garðskaga hér að ofan ber vitni um. Í dag hefur verið varað við óveðri um allt land, þegar þetta er skrifað hefur vegum í nágrenni höfuðborgarinnar verið lokað og gefið hefur verið út að Reykjanesbraut verði lokað fyrir umferð um tíma eftir hádegi í dag. Vonandi verður þokkalegt veður um helgina.

Góða helgi !

Facebooktwittergoogle_plusmail

7. vika 2017.

Fundahöld vikunnar.

Þessi vika var óvenju þétt skipuð fundum hjá bæjarstjóranum. Á mánudaginn var árlegur fundur með lögreglustjóra og hans fólki, þar sem farið var yfir ýmis málefni. Þar var m.a. birt tölfræði um skráð mál hjá lögreglunni og tengjast Garði. Að venju var lítið um slík mál á síðasta ári, sem sýnir m.a. fram á hve gott og friðsælt samfélagið er í Garði. Á mánudaginn var einnig fundur með fulltrúum frá Mílu, þar sem farið var yfir fjarskiptakerfið og ástand þess í Garði. Í ljós hefur komið að þar er ýmsu ábótavant og mun Míla ráðast í tilteknar aðgerðir á næstu vikum til að koma ástandi fjarskiptanetsins í gott horf.

Þá var á mánudaginn samráðsfundur í Hljómahöllinni, sem verkefnastjórn á vegum Innanríkisráðuneytisins um eflingu sveitarstjórnarstigsins boðaði til. Markmið með störfum verkefnastjórnarinnar er að leggja fram tillögur sem stuðla að stærri, öflugri og sjálfbærum sveitarfélögum, ásamt breytingum á verkaskiptingu ríkis og sveitarfélaga. Umfjöllun um þessi mál hefur verið viðvarandi um mjög langt skeið og er hvergi nærri lokið. Jafnframt er um að ræða mikilvægt mál því sveitarfélögin í landinu eru nú 74 og eru mjög mismunandi eftir stærð, bæði landfræðilega og eftir íbúafjölda og að mörgu öðru leyti. Sveitarfélögin hafa því misjafna burði til að standa almennilega að þeim verkefnum sem þeim ber að sinna, svo ekki sé talað um ef sveitarfélögin eiga að taka að sér aukin verkefni frá ríkinu á komandi árum.

Þingmenn Suðurkjördæmis komu í sína árlegu yfirferð um kjördæmið á fund okkar sveitarstjórnarfólks á Suðurnesjum. Þar fór fram umræða um hin ýmsu málefni svæðisins, auk þess sem farið var í vettvangsferð um Helguvíkurhöfn og skoðuð nýbygging hótels í Garði. Hópurinn snæddi síðan dýrindis hádegisverð í veitingahúsinu Röst á Garðskaga. Við áttum góða samveru, ásamt því að fá tækifæri til að ræða saman um margvísleg málefni og hagsmunamál íbúanna á Suðurnesjum.

Þingmenn og sveitarstjórnarmenn funda í Duus
Þingmenn og sveitarstjórnarmenn funda í Duus
Gísli Heiðarsson kynnir hótelbyggingu í Garði
Gísli Heiðarsson kynnir hótelbyggingu í Garði

Loks má nefna vetrarfund Reykjanes Jarðvangs og Markaðsstofu Reykjaness í gær, fimmtudag. Þar voru að vanda flutt góð erindi sem aðallega tengdust ferðaþjónustu. Einnig voru veittar viðurkenningar, annars vegar hlaut Johan D Jónsson þakkarverðlaun ferðaþjónustunnar fyrir vel unnin störf og framlag til uppbyggingar ferðaþjónustu á Reykjanesi, hins vegar hlutu veitingahúsið Vitinn og Rannsóknarsetur Háskólans í Sandgerði hvatningarverðlaun ferðaþjónustunnar.

Norðurljósin á Garðskaga.

Þrátt fyrir nánast stöðugar sunnanáttir að undanförnu, hefur eitt og eitt kvöld mátt sjá norðurljósin frá Garðskaga. Nú í vikunni hafa nokkur hundruð erlendra ferðamanna komið á Garðskaga til að njóta norðurljósanna. Það er áhugavert að fylgjast með þessum góðu gestum okkar upplifa norðurljósin, flestir eiga varla orð til að lýsa hrifningu sinni. Það hefur því verið erill við Garðskagavita og í veitingahúsinu Röst, þar sem ferðalangar hafa notið góðrar þjónustu. Hér eru myndir af norðurljósum sem Jóhann Ísberg tók á Garðskaga í síðustu viku.

Norðurljós og ferðamenn við gamla vitann.
Norðurljós og ferðamenn við gamla vitann.

Norðurljós 2.2.17

Sameiningarmál, íbúafundir í næstu viku.

Í næstu viku verða haldnir íbúafundir í Garði og Sandgerði, sem liður í úttekt á kostum og göllum sameiningar sveitarfélaganna. Íbúafundurinn í Garði verður miðvikudaginn 22. febrúar kl. 19:30 í Gerðaskóla, en í Sandgerði fimmtudaginn 23. febrúar kl. 17 í Vörðunni. Íbúar eru hvattir til þess að mæta vel á þessa íbúafundi og taka þannig virkan þátt í þessu verkefni. Þess má geta að íbúar hvors sveitarfélags eru velkomnir á fundina í báðum sveitarfélögunum.

Konudagurinn.

Nú er Þorri að renna sitt skeið á enda, á morgun laugardag verður Þorraþræll, sem er síðasti dagur Þorra. Konudagurinn er á sunnudaginn, við upphaf Góu. Veðurfar á Þorra hefur yfirleitt verið mun erfiðara en að þessu sinni, oft hafa verið vetrarhörkur með snjó og frostatíma, enda um hávetur. Í tilefni konudagsins er konudagskaffi á leikskólanum Gefnarborg í dag, föstudag, þar sem öllum mömmum og ömmum er boðið í heimsókn og þiggja kaffiveitingar. Þetta er skemmtilegt uppátæki hjá leikskólanum. Við karlar óskum konum til hamingju með konudaginn, svona fyrirfram 🙂 Hér er auglýsing í leikskólanum, þar sem vakin er athygli á konudagskaffinu.

Leikskóli konudagskaffi 2017

Veðrið.

Að undanförnu hefur verið vorveður, um miðjan febrúar ! Meira er ekki um það að segja.

Góða helgi og gleðilegan konudag !

Facebooktwittergoogle_plusmail

6. vika 2017.

Danskeppni Samfés.

Sl. föstudag hélt Samfés danskeppni fyrir ungmenni á efsta stigi grunnskólanna. Keppnin fór fram í félagsheimilinu á Seltjarnarnesi og tókst mjög vel, en 10 lið frá 10 félagsmiðstöðvum tók þátt. Fulltrúar félagsmiðstöðvarinnar Eldingar í Garði voru þær Halla Líf Marteinsdóttir, Ína Sigurborg Stefánsdóttir og Eliza Taylor, en þær æfa allar dans hjá Bryn Ballett Akademíu. Þær stóðu sig mjög vel og voru verðugir fulltrúar Eldingar í keppninni.

Dansarar frá Eldingu.
Dansarar frá Eldingu.

Söngvakeppni Kragans.

Í kvöld, föstudag verður söngvakeppni Kragans í íþróttahúsinu á Álftanesi. Þar munu fulltrúar félagsmiðstöðva etja kappi í söngvakeppni. Fulltrúi félagsmiðstöðvarinnar Eldingar verður Magnús Orri Arnarson og óskum við honum góðs gengis.

Kynning á bandarískum Football í Gerðaskóla.

Sl. mánudag kom ruðningsleikmaðurinn Nicholas Woods í Gerðaskóla og kynnti bandarískan ruðning (Football) fyrir nemendum í elstu bekkjum. Mikill áhugi og fjör var meðal nemendanna og greinilegt að þau nutu þess að taka þátt í þessum hressilega leik. Ekki skemmdi fyrir að framundan var stórleikurinn Super Bowl í bandarísku ruðningsdeildinni, þannig að áhuginn var eflaust meiri fyrir vikið. Þetta var skemmtilegt innlegg í skólastarfið og ekki útilokað að meðal nemenda leynist framtíðar leikmenn í bandarískum ruðningi. Myndin hér fyrir neðan er af hópnum sem spreytti sig í Football, ásamt Nicholas Woods þjálfara.

IMG_3901

Dagur leikskólans sl. mánudag.

Á mánudaginn var dagur leikskólans. Þá var mikið um að vera á Gefnarborg, þar sem börnin unnu m.a. í ýmsum verkefnum og listasmiðjum. Myndirnar hér að neðan eru fengnar af Facebook síðu leikskólans Gefnarborgar og þar má sjá dugnaðinn og áhugann hjá börnunum í listsköpuninni.

Dagur leikskólans 2017.

Dagur leikskólans 2017

Bæjarráð.

Fundur var í bæjarráði í vikunni. Ýmis mál voru á dagskrá að vanda. Þar má m.a. nefna samning við Útskálasókn um stækkun kirkjugarðsins við Útskálakirkju. Minnisblað frá bæjarstjóra um eftirlitsmyndavélar við innkomur í bæinn, en áhugi hefur verið meðal bæjarfulltrúa og íbúa á því að koma upp innkomuvöktun við bæjarmörkin. Bæjarstjóra var falið að vinna málið áfram og skila tillögum til bæjarráðs. Þá má nefna að fjallað var um drög að endurnýjuðum samningi við Fræðsluskrifstofu Reykjanesbæjar um þjónustu við Gerðaskóla og leikskólann Gefnarborg. Loks voru á dagskrá fundargerðir frá nokkrum nefndum og starfshópum, m.a. um atvinnu-og þróunarsvæði á Miðnesheiði, um umhverfi og uppbyggingu á svæðinu við Útskálar og fundargerð frá stýrihópi vegna úttektar á kostum og göllum sameiningar sveitarfélaganna Garðs og Sandgerðisbæjar. Það kennir alltaf ýmissa grasa í dagskrá bæjarráðs.

Netsambönd í Garðinum.

Nú í vikunni varð nokkur umræða meðal garðbúa um netsambönd í bænum. Í ljós hefur komið að mikið vantar upp á að netsamband sé viðunandi, m.a. vegna truflana í sjónvarpsútsendingum og tölvusamskiptum. Fulltrúar sveitarfélagsins áttu góð samskipti við Mílu og Símann um þessi mál í vikunni, eftir helgina munu fulltrúar frá Mílu koma til fundar við okkur á bæjarskrifstofunni þar sem farið verður yfir stöðuna og aðgerðir sem framundan eru til þess að netsamband í Garðinum verði eins og vera ber. Í samfélagi nútímans skiptir gott fjarskiptasamband miklu fyrir alla.

Sameining sveitarfélaga ?

Eins og fram hefur komið er nú unnið að því að greina kosti og galla þess að sameina sveitarfélögin Garð og Sandgerðisbæ. Nú í byrjun febrúar fór fram könnun meðal íbúa sveitarfélaganna um ýmislegt sem málið varðar. Þátttaka var ágæt og þökkum við íbúum fyrir þátttökuna, en könnunin skilaði mikilvægum upplýsingum sem nýtast í verkefninu. Nú í gær og í dag vinna bæjarstjórnir sveitarfélaganna saman að því að greina drifkrafta og óvissuþætti til framtíðar og framundan eru íbúafundir þar sem leitað verður eftir frekari þátttöku íbúanna í verkefninu. Íbúafundirnir verða nánar auglýstir í næstu viku og eru íbúar hvattir til þess að mæta og leggja sitt af mörkum. Þetta er spennandi og áhugavert verkefni sem mun án efa nýtast vel til framtíðar, hvort sem af sameiningu sveitarfélaganna verður eða ekki. Það kemur allt saman í ljós síðar.

Dagur tónlistarskólans á morgun.

Á morgun, laugardaginn 11. febrúar verður dagur tónlistarskólans. Af því tilefni munu nemendur tónlistarskólans koma fram á tónleikum í Miðgarði, sal Gerðaskóla. Tónleikarnir hefjast kl. 11:00.  Garðbúar eru hvattir til að fjölmenna og njóta góðrar tónlistar.

Tónlistarskólinn Garði

Góð aðsókn að Íþróttamiðstöðinni.      

Árið 2016 voru alls um 67 þúsund komur í Íþróttamiðstöðina. Komum fjölgaði um rúmlega 6 þúsund frá árinu 2015. Mest aukning á aðsókn var í líkamsræktina, enda er öll aðstaða þar eins og best verður á kosið. Vonir standa til að aðsókn aukist enn meira í ár, ekki síst þar sem íbúar sveitarfélagsins hafa nú gjaldfrjálsan aðgang að sundlauginni. Líkamlegt atgervi garðbúa fer batnandi ár frá ári um þessar mundir.

Samningur við Víðir.

Nú í morgun undirrituðu bæjarstjóri og Guðlaug Sigurðardóttir formaður Víðis samning milli sveitarfélagsins og Knattspyrnufélagsins Víðis, sem er viðauki við gildandi samstarfssamning. Í samningnum felst annars vegar að Víðir fær fjárframlag frá sveitarfélaginu til að mæta kostnaði vegna framkvæmdastjóra félagsins og hins vegar styrkir sveitarfélagið Víðir vegna mikils ferðakostnaðar á komandi leiktíð í 2. deild, en fyrirsjáanlegt er að Víðir þarf að leggjast í mikil og kostnaðarsöm ferðalög í útileiki víða um landið í sumar. Sveitarfélagið og Víðir eiga mikið og gott samstarf sem nýtist íbúum sveitarfélagsins á margan hátt. Á myndinni hér fyrir neðan má sjá mikla gleði ríkja hjá bæjarstjóra og formanni Víðis við undirritun samningsins í morgun.

IMG_3920

Álagning fasteignagjalda.

Nú er lokið álagningu fasteignagjalda þetta árið. Á heimasíðu sveitarfélagsins, svgardur.is má finna allar nánari upplýsingar varðandi álagningu fasteignagjalda.

Veðrið.

Að undanförnu hefur veðurfarið verið líkt og á öðrum árstíma en um hávetur í febrúar. Hlýindi og sunnan áttir hafa verið ríkjandi. Ennþá hafa starfsmenn sveitarfélagsins að mestu verið lausir við að munda skóflur og moksturstæki vegna snjóa.

Góða helgi !

 

 

Facebooktwittergoogle_plusmail