50. vika 2016.

Molar voru í fríi í síðustu viku, en mikið hefur verið um að vera í Garði síðustu tvær vikur og er hér m.a. stiklað á stóru um það.

Jólasamkomur og sýningar.

Félagsstarf eldri borgara hélt sýningu á handverki tengdu jólum í Auðarstofu. Þar var margt til sýnis og ótrúlega fallegt handverk.  Lista-og menningarfélagið í Garði hefur haft opnar sýningar í Sunnubraut 4 nú í aðdraganda jóla. Þar sýna listamenn í Garði verk sín og eru flest þeirra til sölu. Bæjarstjóra var boðið á jólafund Kvenfélagsins Gefnar, þar sem boðið var upp á dýrindis góðan jólamat og bæjarstjórinn flutti stutta tölu. Nú um síðustu helgi var Aðventukvöld í Útskálakirkju þar sem kirkjan var þétt setin. Þar voru ýmis tónlistaratriði og annað, allt í anda aðventunnar og jólanna. Ýmislegt fleira hefur verið um að vera í Garðinum nú um aðventuna og í aðdraganda jóla. Mikil stemmning og svífandi jólaandi í Garðinum nú á aðventunni.

Sýning á jólaföndri í Auðarstofu.
Sýning á jóla handverki í Auðarstofu.

Nemendur tónlistarskólans fara víða.

Nú þegar jólin nálgast og nemendur tónlistarskólans að fara í jólafrí, þá fara þeir víða um bæinn og leika jólatónlist. Eyþór skólastjóri og hans kennarar vinna gott verk í tónlistarskólanum og það er ánægjulegt að hlusta á þeirra nemendur spila og syngja. Núna í vikunni hafa nemendur komið við á nokkrum stöðum og spilað. Þar á meðal er leikskólinn, en myndin hér að neðan er af Facebook síðu leikskólans Gefnarborgar. Í gær, fimmtudag voru jólatónleikar tónlistarskólans í Miðgarði, sal Gerðaskóla. Þar lék m.a. bjöllukór tónlistarskólans, en hann hefur nú verið endurvakin eftir nokkurra ára hlé. Fjölmenni mætti og nemendur stóðu sig með mikilli prýði. Það er dýrmætt að eiga svo góðan tónlistarskóla sem við Garðbúar búum að.

Jólatónleikar í Gefnarborg.
Jólatónleikar í Gefnarborg. Eyþór með nokkrum nemenda sinna.

Bæjarstjórn í síðustu viku, afgreiðsla fjárhagsáætlunar.

Bæjarstjórn fundaði í síðustu viku.  Þar bar hæst afgreiðsla á fjárhagsáætlun, en auk þess voru ýmsar fundargerðir nefnda og stjórna til umfjöllunar og afgreiðslu. Mikil og góð samstaða er í bæjarstjórninni um fjárhagsáætlunina, enda hefur samvinna bæjarfulltrúa og starfsfólks sveitarfélagsins verið til fyrirmyndar. Það leggur grunninn að góðum árangri. Upplýsingar um fjárhagsáætlun má nálgast á heimasíðu sveitarfélagsins, svgardur.is, einnig var umfjöllun um fjárhagsáætlunina í síðustu Molum úr Garði.

Hleðslustöð fyrir rafbíla – Stoppu-stuð !

Nú í vikunni komu starfsmenn frá Orkusölunni færandi hendi. Þeir afhentu sveitarfélaginu hleðslustöð fyrir rafmagnsbíla, en Orkusalan vinnur að því verkefni að koma upp slíkum hleðslustöðvum í öllum sveitarfélögum. Finna þarf hleðslustöðinni heppilega staðsetningu og vonandi liggur það fyrir áður en langt um líður. Þetta er athyglisvert og þarft verkefni hjá Orkusölunni og fyrir það er þakkað. Hér fyrir neðan er mynd af því þegar bæjarstjóri ásamt Einari Friðrik hjá Umhverfis-, skipulags-og byggingarsviði tóku við hleðslustöðinni úr hendi starfsmanns Orkusölunnar. Nú verður enn meira stuð í Garði !

img_2214

Jólaundirbúningur í skólunum á aðventunni.

Nú nálgast jólin óðfluga, enda langt liðið á aðventuna. Þessa vikuna og fram í þá næstu er stíf dagskrá í Gerðaskóla og leikskólanum Gefnarborg, jólaandinn svífur yfir. Alltaf skemmtileg og kærleiksrík stemmning síðustu dagana í skólunum fyrir jólafrí. Sl. miðvikudag borðuðu allir nemendur og starfsfólk Gerðaskóla saman jólamat í hádeginu. Flutt voru skemmtiatriði og sungin jólalög undir stjórn Vitors Eugenio tónlistarkennara. Hér að neðan eru myndir frá jólahádeginu í Gerðaskóla.

img_3457

img_3444

Í leikskólanum Gefnarborg er borðaður jólamatur í hádeginu í dag, föstudag. Síðar í dag verður svo jólatrésskemmtun leikskólans í Miðgarði í Gerðaskóla. Kærleikurinn og jólastemmningin svífa yfir skólabörnum og starfsfólki skólanna í Garði þessa dagana, enda styttist í að jólahátíðin gangi í garð.

Skötuhlaðborð Víðis.

Í dag, föstudag verður skötuhlaðborð Unglingaráðs Víðis í Samkomuhúsinu, bæði í hádeginu og um kvöldmatarleyti. Þetta er föst hefð í aðdraganda jóla og hefur verið mikil aðsókn undanfarin ár. Gott framtak hjá Víði að halda þessari hefð, því það er ómissandi liður í aðdraganda jóla að fá vel kæsta skötu að borða.

skotuhladbord-vidis-2016

Jólahúsið 2016.

Umhverfisnefnd stendur fyrir vali á jólahúsinu í ár. Íbúum er gefinn kostur á að tilnefna jólahúsið og koma því á framfæri á bæjarskrifstofu. Umhverfisnefndin mun síðan velja jólahúsið og afhenda eigendum þess verðlaun í næstu viku, rétt fyrir jólin. Það eru mörg hús í Garði sem eru fagurlega skreytt og mörg þeirra með miklar ljósaskreytingar. Hins vegar hefur vantað snjóinn til þess að allar þessar fallegu skreytingar njóti sín betur, kannski rætist úr því fyrir jólin. Eigendur jólahússins 2016 fá afhenta forláta verðlaunagrip sem unnin var af Ástu Óskarsdóttur og sjá má hér fyrir neðan. Gripurinn er fjörusteinn alsettur litríkum smásteinum og áletruðum skildi.  Garðbúar eru glysgjarnir nú á aðventunni.

img_2236

Jólaskákmót Samsuð og Krakkaskák.

Á morgun, laugardag verður árlegt jólaskákmót Samsuð og Krakkaskák haldið í Gerðaskóla. Mótið er fyrir alla grunnskólanemendur á Suðurnesjum, framkvæmdaraðili er Siguringi Sigurjónsson hjá Krakkaskák en Siguringi hefur kennt skák við flesta grunnskóla á Suðurnesjum. Við framkvæmd skákmótsins nýtur hann aðstoðar frá Skáksambandi Íslands. Skákmótið verður í Gerðaskóla á morgun kl. 13:00 – 16:00 og eru allir velkomnir til að fylgjast með okkar ungu skáksnillingum etja kappi.

Molar í frí fram yfir áramót.

Þar sem bæjarstjórinn fer í leyfi nú fyrir jól og fram yfir áramót koma næstu molar á nýju ári. Við óskum öllum gleðilegra jóla og þökkum samfylgdina á því ári sem nú er að líða.

Facebooktwittergoogle_plusmail

Fjárhagsáætlun Garðs 2017.

Bæjarstjórn hefur samþykkt fjárhagsáætlun sveitarfélagsins fyrir árið 2017 og rammaáætlun fyrir árin 2018-2020.  Fjárhagsáætlun ber með sér að sveitarfélagið stendur styrkum fótum fjárhagslega og ágætt jafnvægi er í rekstri.

Rekstraráætlun.

Helstu niðurstöður rekstraráætlunar fyrir árið 2017 eru að heildartekjur verði 1.323 mkr. Skatttekjur eru áætlaðar 771 mkr., þar af útsvarstekjur 677 mkr. Áætluð framlög frá Jöfnunarsjóði sveitarfélaga eru 373 mkr.  Ef litið er til útgjalda, þá eru laun og launatengd gjöld áætluð að verði 577 mkr., sem er um 43% af heildartekjum. Annar rekstrarkostnaður 633 mkr., eða um 48% af heildartekjum.

Rekstrarniðurstaða fyrir afskriftir og fjármagnsliði (framlegð) er áætlaður afgangur 114 mkr., sem er um 9% af heildartekjum.  Niðurstaða rekstrarreiknings eftir afskriftir og fjármagnsliði er afgangur rúmlega 29 mkr.  Ef litið er sérstaklega á A hluta rekstraráætlunar, sem er sveitarsjóðurinn sjálfur þá er áætlaður rekstrarafgangur um 36 mkr.

Gjaldskrá í þágu íbúanna.

Samhliða afgreiðslu fjárhagsáætlunar samþykkti bæjarstjórnin gjaldskrá sveitarfélagsins fyrir árið 2017. Afslættir af álögðum fasteignasköttum elli-og örorkulífeyrisþega eru rýmkaðir, þannig að fleiri munu njóta afslátta. Helstu breytingar á þjónustugjaldskránni eru þær að frá 1. janúar 2017 fá íbúar sveitarfélagsins gjaldfrjálsan aðgang að sundlauginni. Þessi breyting er m.a. í þeim tilgangi að hvetja íbúana til heilsueflingar og aukinnar aðsóknar að sundlauginni. Þá má nefna þá breytingu á gjaldskrá að frá næstu áramótum fá íbúar sveitarfélagsins gjaldfrjáls afnot af safnkosti almenningsbókasafns. Markmið með því er að efla bókmenntamenninguna og auka aðsókn að bókasafninu. Hækkunum á einstökum liðum gjaldskrár er stillt í hóf og áfram verður gjaldskrá Sveitarfélagsins Garðs fyrir einstaka þjónustuliði með því lægsta sem sveitarfélög bjóða.

Sjóðstreymi.

Samkvæmt áætlun um sjóðstreymi ársins 2017, þá er veltufé frá rekstri 129 mkr., sem er tæplega 10% af heildartekjum og handbært fé frá rekstri 124 mkr. Afborganir langtímalána verða rúmlega 7 mkr. og fjárfestingar og framkvæmdir 88,3 mkr. Fjármögnun framkvæmda er alfarið af handbæru fé frá rekstri og ekki er gert ráð fyrir lántökum.

Skuldir og skuldbindingar.

Heildarskuldir og skuldbindingar eru áætlaðar 529 mkr. í árslok 2017. Þar af eru lífeyrisskuldbindingar 203 mkr. og leiguskuldbinding 109 mkr. Sveitarsjóður í A hluta áætlunarinnar er skuldlaus, en B hluti skuldar lánastofnunum 60 mkr. Skuldahlutfallið (hlutfall heildar skulda og skuldbindinga af heildartekjum) er 40%. Þessar staðreyndir eru merki um efnahagslega sterka stöðu sveitarfélagsins.

Fjárhagsleg staða.

Það er ljóst að ef til þess kemur að sveitarfélagið þarf að ráðast í fjárfrekar framkvæmdir á næstu árum, þá getur sveitarfélagið mætt því með góðu móti. Annars vegar er til staðar handbært fé, sem er áætlað að verði um 530 mkr. í árslok 2017, auk þess sem skuldastaðan er með þeim hætti að gott svigrúm er til lántöku vegna fjárfrekra verkefna á næstu árum, ef á þarf að halda. Síðan er afkoma rekstrarins með þeim hætti að sveitarfélagið hefur fjárfestingagetu vel yfir 100 milljónir á ári, ef litið er til þess hvert handbært fé frá rekstri er áætlað.

Fjárhagsáætlun haldi.

Eitt er að reikna út fjárhagsáætlun og annað að fylgja henni eftir þannig að hún haldi. Á undanförnum árum hefur tekist vel til við að fylgja fjárhagsáætlunum. Það hefst með virku kostnaðareftirliti og reglulegri eftirfylgni með þróun rekstrarins allt árið. Það eru lykilatriði, því ef upp koma óvænt tilvik sem hafa áhrif á reksturinn þarf að vera svigrúm til að mæta því og gera nauðsynlegar ráðstafanir. Markmið bæjarstjórnar og starfsfólks sveitarfélagsins er að reksturinn sé í góðu jafnvægi og að þær áætlanir sem samþykktar eru haldi og þeim fylgt eftir. Nýsamþykkt fjárhagsáætlun og afkoma undanfarinna ára ber með sér að það hafi tekist vel og við ætlum að halda áfram á þeirri sömu braut.

Nánari upplýsingar á heimasíðu.

Fjárhagsáætlunin, gögn og upplýsingar sem henni fylgja má finna á heimasíðu sveitarfélagsins, svgardur.is. Þar má einnig finna greinargerð bæjarstjóra með fjárhagsáætlun, þar sem allar helstu upplýsingar liggja fyrir.

 

Facebooktwittergoogle_plusmail

48. vika 2016.

Aðventan og jólaljósin.

Nú þegar Aðventan er hafin eru margir húseigendur að koma upp og kveikja á alls kyns ljósaskreytingum á húsum sínum. Sums staðar eru ekki einungis ljósaskreytingar á húsunum, heldur eru ljós á trjám og öðru umhverfis og við húsin. Í Garði eru húseigendur duglegir við að koma upp ljósaskreytingum og fjölgar þeim dag frá degi um þessar mundir sem kveikja á ljósaskreytingum á sínum húsum.

Ljósin kveikt á jólatrénu.

Sl. sunnudag, þann fyrsta í Aðventu voru ljósin tendruð á jólatrénu í hjarta bæjarins. Veður var hið besta og var fjölmenni mætt til að taka þátt.  Flutt var hugvekja, Bergdís Júlía Sveinsdóttir yngsti nemandi Gerðaskóla kveikti ljósin á trénu, Söngsveitin Víkingar sungu jólalög og jólasveinar mættu á staðinn. Þá sá unglingaráð Reynis / Víðis um að reiða fram heitt súkkulaði og piparkökur. Það var ánægjuleg stund sem garðbúar og gestir áttu saman á sunnudaginn við jólatréð. Auk þess var fjölskyldumessa í Útskálakirkju og Kvenfélagið Gefn hélt sinn árlega jólabasar. Aðventustemmning í Garðinum.

Fjölmenni tók þátt í að kveikja ljósin á jólatrénu.
Fjölmenni tók þátt í að kveikja ljósin á jólatrénu.

Jólastemmning í leikskólanum.

Nú í aðdraganda jólanna þarf ýmislegt að gera til að undirbúa jólahátíðina, við það skapast jólastemmning. Börnin í Leikskólanum Gefnarborg leggja sitt af mörkum og taka þátt í undirbúningi jóla. Í vikunni tóku þau til hendi og bökuðu piparkökur, sem eru ómissandi þáttur í aðdraganda jóla. Það var mikil einbeiting og áhugi hjá börnunum við piparkökubaksturinn, eins og sjá má dæmi um á myndinni hér fyrir neðan, sem var fengin á Facebook síðu leikskólans.

Einbeiting við piparkökubakstur.
Einbeiting við piparkökubakstur.

Góður gestur í Gerðaskóla.

Í byrjun vikunnar kom Þorgrímur Þráinsson rithöfundur með meiru í heimsókn í Gerðaskóla. Hann hélt fyrirlestur fyrir nemendur og ræddi við þá um lífið og tilveruna. Þorgrímur er duglegur við að fara víða og tala við nemendur grunnskólanna, þetta framtak hans er gott og lofsvert og ber að þakka honum fyrir það.

Íbúafundur.

Bæjarstjórn boðaði til íbúafundar sl. miðvikudag og var ágæt mæting íbúa á fundinn. Aðal efni fundarins var kynning á tillögu um fjárhagsáætlun næsta árs, sem verður á dagskrá bæjarstjórnar í næstu viku. Fundarmenn voru almennt ánægðir með áætlunina og fjárhagslega stöðu sveitarfélagsins. Á fundinum var einnig rætt um málefni sveitarfélagsins og fengu íbúar svör við ýmsum spurningum sem bornar voru upp. Svona fundir eru mikilvægir, bæði fyrir sveitarstjórnarfólkið og íbúana þar sem í senn koma fram upplýsingar og tækifæri gefst til umræðu um málefni sveitarfélagsins og íbúa þess.

Veðrið.

Veðurfarið að undanförnu er óvenjulegt ef tekið er mið af árstíma. Hlýindi og rigning af og til. Hitamælirinn við sundlaugina sýndi 7° hita kl. 7:00 í morgun. Það er ekki laust við að margir sakni þess að hafa snævi þakta jörð nú í byrjun Aðventu, ekki er ólíklegt að þeim hinum sömu verði að ósk sinni en ekkert slíkt virðist þó í kortunum næstu daga.

Góða helgi.

Facebooktwittergoogle_plusmail