43. vika 2016.

Kosningar í Gerðaskóla.

Það eru ekki bara alþingiskosningar í gangi þessa dagana. Nemendur Gerðaskóla ganga til kosninga í dag og taka afstöðu til tiltekinna mála. Framkvæmd kosninga nemendanna verður með sama hætti og verður á morgun vegna alþingiskosninganna. Það verða dyraverðir, kjörstjórar með „kjörskrá“, nemendur nota kjörklefa til að kjósa og skila atkvæðaseðlum sínum í kjörkassa. Þetta er m.a. til þess að kenna nemendunum að taka þátt í kosningum, en svo vel vill til að kosningar til Alþingis fara fram í Gerðaskóla á morgun og þar er búið að koma upp aðstöðu til að framkvæma kosningarnar, sem nemendur og starfsfólk skólans nota í dag fyrir sínar kosningar. Þess má geta að elstu nemendur Gerðaskóla hafa öðlast kosningarétt þegar næstu alþingiskosningar verða eftir fjögur ár og því er kosningin í Gerðaskóla í dag ágæt æfing fyrir þá. Vonandi skilar það sér í aukinni kosningaþátttöku yngstu hópa kjósenda, sem því miður hafa látið sig vanta á kjörstað í of miklum mæli í undanförnum kosningum. Skemmtilegt framtak hjá Gerðaskóla.

Kjörseðillinn
Kjörseðillinn
Biðröð á kjörstað í Gerðaskóla.
Biðröð á kjörstað í Gerðaskóla.

Bæjarráð.

Fundur var í bæjarráði í vikunni. Á dagskrá fundarins bar hæst umfjöllun um fjárhagsáætlun næsta árs. Fjárhagsáætlun verður á dagskrá bæjarstjórnar í næstu viku, þegar fram fer fyrri umræða um áætlunina.

Verðmætasköpun í atvinnulífinu.

Í gær, fimmtudag var haustfundur Atvinnuþróunarfélags Suðurnesja, Heklunnar.  Á fundinum var fjallað um verðmætasköpun í atvinnulífinu og fluttar um það áhugaverðar framsögur. Enn og aftur kemur fram að samfara mjög auknum umsvifum á Keflavíkurflugvelli er Reykjanesið heitasta svæði landsins er varðar tækifæri, uppbyggingu og blómleg samfélög. En tækifærin eru ekki einungis tengd fjölgun ferðamanna og auknum umsvifum ferðaþjónustu, tækifærin liggja í ýmsum öðrum greinum og mörgum sviðum. Það eru miklar áskoranir og risavaxin verkefni sem blasa við sveitarfélögunum og atvinnulífinu á Suðurnesjum. Það eru miklir hagsmunir í húfi, ekki aðeins fyrir Suðurnesin heldur landið allt.

Á fundinum var bent á þær gríðarlegu miklu tekjur sem aukin umsvif ferðaþjónustu skilar ríkissjóði í formi skatta og gjalda, sem og hvað gjaldeyristekjur þjóðarbúsins aukast mikið vegna mikillar fjölgunar erlendra ferðamanna sem sækja landið heim. Í því sambandi er sláandi hve lítill hluti af þessum auknu tekjum ríkissjóðs fara í að fjármagna uppbyggingu innviða í landinu, sem brýnt er að gera til þess að mögulegt sé að taka við öllum þeim fjölda erlendra ferðamanna sem heimsækja landið og ferðast um það. Þar er ekki aðeins um að ræða vegi og samgöngur, heldur ekki síður heilbrigðisþjónustu, löggæslu og fjarskipti, svo eitthvað sé nefnt. Ólíkt mörgum öðrum atvinnugreinum, þá nýtast þeir innviðir sem byggja þarf upp og fjármagna vegna ferðamanna öllum landsmönnum og kemur okkur öllum til góða. Það er ljóst að stjórnvöld verða að gefa þessu meiri gaum og ráðstafa meiri hluta af þeim tekjum sem ríkissjóður er að fá vegna ferðamanna til uppbyggingar innviða. Að öðrum kosti blasir við að við stefnum lóðbeint í óefni og draumurinn breytist í martröð.

Alþingiskosningar.

Á morgun, laugardag verða kosningar til Alþingis. Vonandi verða úrslit þeirra og það sem á eftir fylgir til gæfu og hagsbóta fyrir land og þjóð. Kjósendur eru hvattir til að nýta sinn kosningarétt, mæta á kjörstað og taka þátt í kosningunum.

Veðrið.

Veðurfarið hefur verið frekar erfitt að undanförnu. Ríkjandi suðlægar áttir með hvössum vindi á köflum og rigningu en inn á milli hefur verið sólskin, það má því segja að vikan hafi einkennst af því að skipst hafa á skin og skúrir. Þegar þetta er skrifað á föstudags morgni skín sólin í ágætu veðri, en haustið hefur færst yfir og má reikna með kaldari tíð. Við getum átt von á slyddu eða snjókomu og hálku á vegum, það er því mikilvægt að gera sig kláran fyrir slíkar aðstæður og sýna aðgát í umferðinni.

Góða og ánægjulega helgi !

Facebooktwittergoogle_plusmail

42. vika 2016.

Aðalfundur Sambands sveitarfélaga á Suðurnesjum.

Um síðustu helgi var aðalfundur Sambands sveitarfélaga á Suðurnesjum haldinn í Gerðaskóla í Garði. Dagskrá fundarins var efnismikil og um margt mjög áhugaverð. Mikið fór fyrir erindum og umræðu um þróun farþegafjölda á Keflavíkurflugvelli og mál því tengd, m.a. um ferðaþjónustu, íbúaþróun og þær áskoranir sem Suðurnesin í heild sinni standa frammi fyrir. Þá var fjallað um samgönguáætlun og það mikilvæga og aðkallandi mál að byggja upp flutningskerfi raforku út á Reykjanesið. Eftir þennan góða fund stendur að sveitarfélögin, atvinnulífið og ýmsir aðilar verða nú að fara í að móta stefnu um það hvernig samfélagið mætir þeirri þróun sem nú á sér stað og mun verða á næstu árum. Hér er um stórt og mikilvægt verkefni að ræða, áskoranirnar eru til staðar og þær eru til að takast á við. Það eru sannarlega spennandi tímar á Suðurnesjum.

Varnarliðið komið aftur ?

Sl. mánudag hrukku margir við í Garðinum, en þá voru herþotur á æfingaflugi úti fyrir ströndinni. Einnig var varðskipið Þór að lóna stutt frá landi og flugu þoturnar yfir og umhverfis varðskipið. Upp kom sú spurning hvort herinn væri kominn aftur ! Svarið var að tékkneskar herþotur sem sinna loftrýmisgæslu við landið voru við æfingar, en hávaðinn var ærandi svo vart var samtalshæft. Börnin á leikskólanum Gefnarborg voru agndofa yfir þessu og skimuðu út á hafið þar sem varðskipið var á ferð. Eflaust hafa einhverjir Garðbúar hugsað til fyrri tíðar þegar umferð herþota var algeng yfir Suðurnesjum.

Leikskólabörnin horfa til varðskipsins Þórs. (Mynd: Leikskólinn Gefnarborg).
Leikskólabörnin horfa til varðskipsins Þórs. (Mynd: Leikskólinn Gefnarborg).

Framkvæmdir á lóð leikskólans.

Lóð leikskólans var stækkuð verulega á síðasta ári, en af þeim sökum hafa verið dimmir blettir á lóðinni þar sem hefur vantað lýsingu. Nú á dögunum var bætt úr því og hefur verið komið fyrir ljósastaurum sem lýsa upp leiksvæði barnanna. Ungir og upprennandi gröfukarlar á leikskólanum fylgdust með dreymandi svip með verktakanum sem gróf fyrir ljósastaurunum og er ekki ólíklegt að einhverjir hafi ákveðið að vinna á gröfu þegar aldur færist yfir þá. Þessi dásamlega mynd af leikskólabörnum fylgjast hugfangin með gröfuvinnunni birtist á Facebook síðu leikskólans Gefnarborgar.

Gröfuvinna við leikskólann.
Gröfuvinna við leikskólann.

Bæjarstjórnarfundur.

Á miðvikudag var fundur í bæjarstjórn, þar sem m.a. var fjallað um kauptilboð í Garðvang. Bæjarstjórn samþykkti að ganga að tilboðinu og slíkt hið sama hafa hin sveitarfélögin sem eru eigendur hússins gert. Kaupandi er Nesfiskur í Garði, en fyrirtækið mun nýta húsnæðið fyrir sitt starfsfólk. Fundurinn var einnig vinnufundur bæjarstjórnar með starfsfólki bæjarskrifstofu þar sem farið var yfir drög að fjárhagsáætlun fyrir næsta ár. Bæjarráð mun halda áfram umfjöllun og vinnu við fjárhagsáætlun, en á næsta fundi bæjarstjórnar verður fjárhagsáætlun til fyrri umræðu. Samkvæmt sveitarstjórnarlögum á afgreiðslu fjárhagsáætlunar að vera lokið fyrir 15. desember, en bæjarstjórn Garðs mun afgreiða áætlunina í byrjun desember eftir aðra umræðu.

Alþingiskosningar.

Nú styttist óðum í alþingiskosningarnar þann 29. október nk. Kjósendur í Garði, sem geta af einhverjum ástæðum ekki mætt á kjörstað þann dag, eiga kost á því að kjósa utan kjörstaðar á bæjarskrifstofunni á opnunartíma skrifstofunnar. Þetta fyrirkomulag er í samstarfi við sýslumannsembættið og er liður í að auka þjónustu við íbúana.

Veðrið.

Við nutum veðurblíðu fram í miðja vikuna, þegar var hægviðri og hlýtt. Á miðvikudag byrjaði fjörið með miklum vindi og rigningu af suð-austri og hefur það haldið áfram, en veðrið hefur að mestu gengið niður þegar þetta er skrifað á föstudagsmorgni.

Óveður miðvikudaginn 19. okt. 2016 um hádegi.
Óveður miðvikudaginn 19. okt. 2016 um hádegi.

 

Góða helgi !

Facebooktwittergoogle_plusmail

41. vika 2016.

Bleikur föstudagur.

Í dag er bleikur föstudagur, í anda átaks Krabbameinsfélagsins gegn krabbameini í þessum mánuði. Vonandi hafa sem flestir styrkt þetta verkefni með því að fjárfesta í bleiku slaufunni. Þetta er lofsvert átak hjá Krabbameinsfélaginu, sem gegnir mikilvægu hlutverki í forvörnum og fræðslu um krabbamein.

Bleika slaufan 2016.
Bleika slaufan 2016.

Bæjarráð.

Fundur var haldinn í bæjarráði í vikunni. Á fundinum voru lögð fram fyrstu drög að rekstraráætlun sveitarfélagsins fyrir árið 2017, en áætlunin er í vinnslu þessa dagana og verður fyrsta umræða í bæjarstjórn í byrjun nóvember. Af öðrum málum má nefna að fjallað var um erindi frá Sandgerðisbæ, þar sem m.a. kemur fram að bæjarstjórn Sandgerðis hafi samþykkt að skipa í starfshóp sem fái það verkefni að kanna kosti og galla sameiningar Garðs og Sandgerðisbæjar. Bæjarráð Garðs samþykkti að leggja til við bæjarstjórn að Garður skipi sína fulltrúa í starfshópinn. Þess má geta að bæjarstjórn Garðs samþykkti í júní sl. að taka þátt í þessu verkefni en bæjarstjórn Sandgerðis tók málið fyrir og gerði sína samþykkt núna í þessari viku. Þess má vænta að vinna við könnun á kostum og göllum sameiningar sveitarfélaganna hefjist nú á næstu vikum. Þegar niðurstaða þessarar vinnu liggur fyrir munu bæjarstjórnir sveitarfélaganna taka ákvarðanir um hvort hafnar verða formlegar viðræður um sameiningu sveitarfélaganna, samkvæmt ákvæðum sveitarstjórnarlaga þar um og slíkt ferli endar síðan á því að íbúar sveitarfélaganna greiða atkvæði um tillögu um sameiningu sveitarfélaganna.

Kosning utan kjörfundar á bæjarskrifstofu.

Í samstarfi við sýslumannsembættið fer fram kosning til Alþingis utan kjörstaðar á bæjarskrifstofunni í Garði. Sveitarfélagið tók þátt í tilraunaverkefni um utankjörfundar atkvæðagreiðslu með þessum hætti fyrir forsetakosningar sl. sumar, það gekk mjög vel og nýttu nokkrir íbúar í Garði sér þessa þjónustu. Nú er aftur boðið upp á þessa þjónustu fyrir alþingiskosningarnar. Atkvæðagreiðsla fer fram á opnunartíma bæjarskrifstofunnar og annast starfsfólk framkvæmdina. Íbúar Garðs sem þurfa af einhverjum ástæðum að kjósa utan kjörstaðar eru hvattir til þess að nýta sér þessa góðu þjónustu, mæta á bæjarskrifstofuna og nota þar kosningarétt sinn. Almennt eru kjósendur hvattir til að nota sinn kosningarétt og greiða atkvæði í komandi Alþingiskosningum, sem og öllum öðrum kosningum. Það að taka þátt í kosningum er ekki aðeins lýðræðislegur réttur, heldur mikilvægt tæki fyrir hver og einn til að hafa áhrif. Í raun er það lýðræðisleg skylda okkar hvers og eins að nota okkar kosningarétt og taka þátt í kosningum.

„Stóriðja í stöðugum vexti“.

Isavia hélt fund í vikunni þar sem farið var yfir stöðu mála og framtíðarhorfur varðandi farþegafjölda sem fer um Keflavíkurflugvöll. Á fundinum var einnig kynnt skýrsla með yfirskriftinni „Keflavíkurflugvöllur – stóriðja í stöðugum vexti“ þar sem fjallað er um hvaða þýðingu uppbygging Keflavíkurflugvallar hefur til framtiðar. Þar kom m.a. fram að ef hóflegustu spár ganga eftir þá verður Keflavíkurflugvöllur orðinn stærsti vinnustaður landsins eftir nokkur misseri, fjölgun starfsmanna á hverju ári verður sem svarar starfsmannafjölda í einu álveri. Það er ljóst að hér er um mjög stórt mál að ræða, með afar krefjandi verkefnum til úrlausnar. Það liggur fyrir út frá því að sveitarfélögin, ríkið og fjölmargir aðilar þurfa að taka höndum saman, móta stefnu um uppbyggingu innviða og alls kyns starfsemi til framtíðar til þess að mögulegt verði að mæta þeirri þróun sem farið var yfir á fundinum. Suðurnesin eru og verða í brennidepli næstu misseri og ár, þótt svo ekki nema eitthvað af þeim spám sem fjallað var um ganga eftir.

Aðalfundur Sambands sveitarfélaga á Suðurnesjum.

Aðalfundur Sambands sveitarfélaga á Suðurnesjum verður haldinn í Garði nú um helgina. Auk venjulegra aðalfundarstarfa verða áhugaverð erindi flutt, sem munu án efa kalla fram líflegar umræður. Þessi erindi fjalla öll meira og minna um stöðu mála á Suðurnesjum og framtíðarhorfur, m.a. búsetuþróun, samgöngumál, raforkumál og uppbyggingu innviða til að mæta mikilli aukningu ferðamanna á svæðinu. Allt að gerast á Suðurnesjum.

Kvennakvöld Víðis.

Í kvöld, föstudag verður árlegt kvennakvöld Víðis í Samkomuhúsinu. Mikil aðsókn er jafnan að kvennakvöldinu og samkvæmt heimildum Mola er uppselt og því verður fullt hús af konum í Samkomuhúsinu í kvöld. Miklar sögur hafa farið af stemmningunni á kvennakvöldunum undanfarin ár, karlar í Víði sjá um þjónustu við konurnar og fer sögum af því að mikil eftirspurn sé eftir því meðal karlanna að fá að þjóna á kvennakvöldunum. Eins og sést á myndinni hér að neðan, þá er allt tilbúði fyrir kvennakvöldið og að sjálfsögðu er bleiki liturinn alls ráðandi á þessum bleika föstudegi. Frábært framtak hjá Víði og óskum við konunum góðrar skemmtunar í kvöld.

Allt klárt fyrir kvennakvöld Víðis.
Allt klárt fyrir kvennakvöld Víðis.

Ljóðasamkeppni Hollvina Unu í Sjólyst.

Hollvinir Unu í Sjólyst efna til ljóðasamkeppni í annað sinn á Suðurnesjum, undir heitinu Dagstjarnan 2016. Nánari upplýsingar um ljóðasamkeppnina má m.a. finna á heimasíðu sveitarfélagsins, svgardur.is.  Þetta er ánægjulegt framtak hjá Hollvinum Unu og vonandi að sem flestir taki þátt.

Una í Sjólyst
Una í Sjólyst

Veðrið.

Veðrið þessa vikuna hefur að mestu einkennst af suðlægum áttu, vindi og vætutíð. Óvenju mikið hefur rignt suma dagana, en nú undir lok vikunnar hefur stytt upp. Þegar þetta er skrifað á föstudagsmorgni skín sólin, en eftir leiðindin í veðrinu alla vikuna sér verulega á trjágróðri, sem hefur fellt mikið af laufum. Útlit er fyrir ágætt helgarveður.

Góða helgi !

Facebooktwittergoogle_plusmail

40. vika 2016.

Það hefur verið frekar rólegt yfir Garðinum síðustu vikuna, nema hvað haustlægðirnar eru farnar að koma á færibandi. Veðrið hefur verið frekar erfitt, vikan hófst með þrumum, eldingum og hagléli á mánudags morguninn. Í kjölfarið hafa verið hvassar sunnan áttir með rigningu, af og til hefur þó slegið á milli lægða, til dæmis var ágætt veður í gær fimmtudag.

Fjárhagsáætlun.

Nú stendur yfir vinnsla fjárhagsáætlunar fyrir næsta ár og rammaáætlunar fyrir næstu þrjú árin þar á eftir. Við vinnslu fjárhagsáætlunar er gengið út frá ýmsum forsendum og er útkomuspá fyrir þetta ár grunnurinn, en útkomuspá var lögð fyrir bæjarráð í síðustu viku og er ágætt útlit með rekstrarafkomu sveitarfélagsins á þessu ári. Aðrar helstu forsendur felast m.a. í þjóðhagsspá um breytingar á verðlagi næsta árið og í kjarasamningum varðandi launaþróun. Eftir umfjöllun í bæjarráði og vinnufundi bæjarfulltrúa með starfsfólki sveitarfélagsins verður fjárhagsáætlun tilbúin í lok október til fyrri umræðu í bæjarstjórn. Samkvæmt lögum á bæjarstjórn að ljúka afgreiðslu fjárhagsáætlunar eftir síðari umræðu fyrir 15. desember.

Bæjarstjórnarfundur.

Bæjarstjórn Garðs kom saman til fundar í vikunni. Á dagskrá voru fundargerðir fastanefnda sveitarfélagsins og stjórna sem sveitarfélagið á aðild að með öðrum sveitarfélögum. Góð samstaða og vinnuandi er í bæjarstjórninni, sem er ein forsenda þess að vel gangi við stjórnun og rekstur sveitarfélagsins.

Haustið er annatími hjá sveitarstjórnarfólki.

Fyrir sveitarstjórnarfólk er haustið annatími á margan hátt. Þunginn í daglegu starfi þessar vikurnar felst í vinnslu fjárhagsáætlunar og stefnumótunar, en á þessum árstíma er einnig óvenju mikið um alls kyns fundi og ráðstefnur. Þar má m.a. nefna fjármálaráðstefnu sveitarfélaga sem var undir lok september, aðalfundur Sambands sveitarfélaga á Suðurnesjum verður í Garðinum eftir viku, ásamt því að sveitarstjórnarmenn þurfa að mæta á margvíslega fundi þar sem farið er yfir mikilvæg málefni sveitarfélaga sem snerta bæði nútíð og ekki síður framtíðina. Sem dæmi um fundi sveitarstjórnarmanna í þessari viku má nefna fund með stjórnendum Landsnets sl. mánudag þar sem farið var yfir ástand og nauðsynlega uppbyggingu flutningskerfis raforku, sem varðar fyrst og fremst orkuöryggi íbúa og atvinnulífs á Suðurnesjum en þar eru ákveðnar blikur á lofti. Í gær, fimmtudag var fundur með verkefnisstjórn um nýja byggðaáætlun sem er í vinnslu. Á morgun, laugardag verður svo aðalfundur Öldungaráðs Suðurnesja.

Knattspyrnan.

Ævintýri karlalandsliðsins í knattspyrnu heldur áfram og þeir halda þjóðinni við efnið. Frábær sigur í gærkvöldi á Finnlandi, dramatíkin undir lok leiksins sýnir og sannar að það eðli okkar íslendinga að gefast aldrei upp þótt móti blási skilar árangri. Framganga íslenska liðsins var til fyrirmyndar, þótt svo að knattspyrnulega séð hafi þetta ekki verið besti leikur liðsins. En, það að klára leiki á þennan hátt er ákveðinn gæðastimpill og sýnir hvað rétt hugarfar með sigurvilja skiptir miklu máli.  Næsti leikur liðsins verður á sunnudag gegn Tyrkjum, velgengni íslenska liðsins undanfarin misseri gerir mann heldur frekan til fjárins og því er ekkert annað en sigur í leiknum sem kemur til greina.  Ekki má gleyma að minnast á frábæran árangur kvennalandsliðsins, sem fyrir stuttu tryggði sér enn og aftur þátttökurétt í lokakeppni evrópumótsins á næsta ári. Stelpurnar hafa svo sannarlega staðið sig vel og í samanburði er árangur þeirra ekki síðri en hjá karlaliðinu.  Loks er það U21 landsliðið, sem heldur áfram með sinn góða árangur sem leggur ákveðinn grunn að áframhaldandi góðu gengi A-landsliðs Íslands á næstu árum.  Frábær árangur hjá íslensku knattspyrnufólki !

Góða helgi !

 

Facebooktwittergoogle_plusmail