30. vika 2016.

Makrílvertíð á Gerðabryggju.

Eins og kunnugt er hefur bryggjan í Garði verið aflögð sem löndunarbryggja og fiskiskip hafa ekki lagt að bryggjunni í allmörg ár. Engu að síður berst nokkur afli á land við bryggjuna, einkum yfir hásumarið. Skýringin er sú að þegar Makríll gengur inn með ströndinni, þá veiðist gjarnan mikið af Makríl á stöng frá Gerðabryggju. Nú undanfarið hefur orðið vart við Makríll framan við bryggjuna og margir veiðimenn hafa mætt með veiðistangir sínar og kastað fyrir Makríl. Suma daga hefur veiðst vel og því nokkur afli komið á land. Hitt er annað að þessi sjávarafli er utan kvóta, ekki vigtaður og skráður, enda er heimilt að veiða sér afla úr sjó í soðið. Það er því ljóst að víða hefur Makríll verið matreiddur og snæddur að undanförnu og má gera ráð fyrir að svo verði eitthvað áfram. Hafnarstjóri brýnir fyrir makrílveiðimönnum að gæta varúðar á bryggjunni og sýna af sér góða umgengni um hafnarsvæðið, en slæm umgengni hefur því miður fylgt veiðimennskunni á bryggjunni.

Mikill fjöldi ferðamanna í sumar.

Í sumar hafa mjög margir ferðamenn heimsótt Garðinn og liggur leið flestra á Garðskaga. Um er að ræða mikla aukningu frá fyrri árum, enda virðist náttúruperlan Garðskagi toga sífellt fleiri ferðamenn til sín. Ekki liggur fyrir hve margir heimsækja Garðskaga á ársgrundvelli, en það er ljóst að sá fjöldi er umtalsverður. Uppbygging á þjónustu og afþreyingu á Garðskaga er í fullum gangi og miðar að því að veita gestum á Garðskaga sem besta þjónustu, ásamt því að vernda umhverfið sem er einstakt.

Nú nýlega var opnað lítið kaffihús í gamla vitanum á Garðskagatá, hefur það vakið mikla athygli og þangað hafa margir gestir komið nú þegar til að fá sér kaffisopa.

Kaffihúsið Flösin, eða The Old Lighthouse Cafe á Garðskaga.
Kaffihúsið Flösin, eða The Old Lighthouse Cafe á Garðskaga.(mynd: Guðmundur Sigurðsson).

Heimsþekktir tónlistarmenn á Garðskaga.

Sl. þriðjudag voru heimsþekktir tónlistarmenn að störfum á Garðskaga. Það voru þau Ólafur Arnalds og Nanna Bryndís Hilmarsdóttir söngkona í Of Monsters And Men, en Nanna er Garðbúi sem ólst upp hér í Garðinum. Þau sömdu saman lag og unnu að upptökum í Garðskagavita, enda er hljómburður í vitanum einstakur og mikil upplifun að verða vitni að tónlistarflutningi í honum. Þá voru kvikmyndaupptökur á Garðskaga, sem verða notaðar í video með laginu sem þau tóku upp. Leikstjórinn Baldvin Z stjórnaði kvikmyndaupptökunum, Garðbúinn og Edduverðlaunahafinn Kristín Júlla Kristjánsdóttir vann með listafólkinu við upptökurnar. Það verður spennandi að sjá og heyra afrakstur listamannanna frá verunni á Garðskaga, en áætlað er að lagið og videomyndin verði opinberað á netinu í byrjun næstu viku. Allt að gerast í Garðinum.

Myndirnar hér að neðan tók Jóhann Ísberg af þeim Nönnu, Kristínu og Ólafi á Garðskaga, en þar var einstök veðurblíða á þriðjudaginn líkt og oft hefur verið í sumar.

Nanna og Kristín Júlla á Garðskaga
Nanna og Kristín Júlla á Garðskaga
Ólafur Arnalds í Garðskagavita.
Ólafur Arnalds í Garðskagavita.

Miðnesheiði, vinna stýrihóps.

Í upphafi sumars gengu sveitarfélögin Garður, Sandgerðisbær og Reykjanesbær til samstarfs um þróun og skipulag á uppbyggingu atvinnustarfsemi á Miðnesheiði við Keflavíkurflugvöll. Skipaður var stýrihópur fulltrúa sveitarfélaganna sem hefur unnið ötullega að verkefninu í sumar. Unnið er að því að afmarka það landsvæði sem verkefnið á að ná til, ásamt því að framundan eru viðræður stýrihópsins við ríkið og ríkisfyrirtæki á svæðinu með samstarf um verkefnið að leiðarljósi. Um er að ræða mjög mikilvægt mál til lengri framtíðar, þannig að sem best takist til við að þróa og byggja svæðið upp. Samfara mjög auknum umsvifum tengdum sífellt meiri umferð um Keflavíkurflugvöll, hafa mörg fyrirtæki sem starfa að flugtengdri þjónustu og þjónustu við ferðafólk leitað eftir lóðum fyrir sína starfsemi á því svæði sem verkefnið nær til. Það er því mikilvægt að vel takist til við skipulag og uppbyggingu svæðisins til framtíðar og það kallar á gott samstarf sveitarfélaganna, ríkisins og fleiri aðila við verkefnið. Vonandi gengur það eftir, enda miklir hagsmunir í húfi til framtíðar litið.

Skrúðgarðurinn við Bræðraborg.

Skrúðgarðurinn við Bræðraborg var byggður upp og ræktaður í áratugi af Magnúsi Magnússyni frá Bræðraborg. Magnús fæddist árið 1915 og lést árið 1994. Unnur Björk Gísladóttir eiginkona Magnúsar hélt starfi hans við garðinn áfram eftir fráfall hans og árið 2005 afhenti Unnur Björk sveitarfélaginu garðinn í minningu Magnúsar.

Í vor og sumar hefur sumarstarfsfólk sveitarfélagsins unnið mikið og gott verk í Bræðraborgargarði, undir stjórn Einars Friðriks Brynjarssonar tæknifulltrúa hjá Umhverfis-,skipulags-og byggingarsviði og Berglindar Fanney Guðlaugsdóttur verkstjóra vinnuskólans. Bræðraborgargarðurinn er fallegur skrúðgarður í nágrenni Íþróttamiðstöðvarinnar, með miklum og margvíslegum gróðri. Garðurinn sannkallaður sælureitur sem ánægjulegt er að heimsækja.

Myndirnar hér að neðan eru af þeim Einari Friðrik og Berglindi Fanney  í sælureitnum Bræðraborgargarði, í sól og blíðuveðri nú í vikunni.

Einar Friðrik og Berglind í Bræðraborgargarði.

Í Bræðraborgargarði

 

Víðismenn misstigu sig!

Knattspyrnuliði Víðis hefur gengið vel í 3. deildinni í sumar.  Liðið er nú í góðri stöðu í öðru sæti í baráttunni um að vinna sér sæti í 2. deild að ári. Það hefur verið ánægjulegt að horfa á leiki liðsins í sumar, enda liðið vel spilandi og skorar mikið af mörkum. Eins og stundum gerist þá misstíga menn sig á beinu brautinni, nú í vikunni tapaði Víðir illa og var það aðeins annar tapleikur liðsins í sumar. Framundan er síðari hluti mótsins og margir spennandi leikir á næstu vikum. Áfram Víðir !

Verslunarmannahelgi framundan.

Nú er Verslunarmannahelgin að ganga í garð. Að venju verða margir á ferðinni alla helgina og um allt land. Á mörgum stöðum er skipulögð dagskrá sem margir taka þátt í, aðrir ferðast um landið í öðrum tilgangi. Ferðalangar eru hvattir til varúðar í umferðinni þannig að allir komist heilir heim að ferðalagi loknu.

 

Góða helgi !

 

Facebooktwittergoogle_plusmail

28. vika 2016.

Molar eru komnir úr sumarleyfi og verður þráðurinn tekinn upp aftur. Mikið hefur verið um að vera í Garði síðustu vikurnar og svo verður áfram.

Sólseturshátíð.

Bæjarhátíð garðmanna, Sólseturshátíðin var síðustu helgina í júní. Dagskrá hátíðarinnar náði yfir heila viku og náði hápunkti laugardaginn 25. júní. Góð þátttaka var í hátíðinni og tókst að vanda vel til við framkvæmd og þátttöku almennt. Garðbúar komu víða fram á ýmsum vettvangi hátíðarinnar, fluttu tónlist, hlupu víðavangshlaup o.m.fl. Svona hátíð er mikilvæg fyrir samfélagið og er öllum þeim sem lögðu sitt af mörkum þakkað þeirra framlag.

Ungir og efnilegir rokkarar stigu á stokk á Sólseturshátíð.
Ungir og efnilegir rokkarar stigu á stokk á Sólseturshátíð.

Sumarhátíð leikskólans.

Fyrr í sumar var sumarhátíð leikskólans Gefnarborgar. Að vanda var mikið um dýrðir með alls kyns uppákomum. Sumarhátíðin er alltaf skemmtileg og gaman að fylgjast með leikskólabörnunum sem hafa mikla ánægju af hátíðarhöldunum.

20160607_141701 20160607_141713

Garðskagi.

Unnið hefur verið að ýmsum breytingum á Garðskaga í vor og sumar. Nú hefur lítið kaffihús opnað í gamla vitanum, framkvæmdum í safnhúsi byggðasafnsins er að mestu lokið í bili. Byggðasafnið hefur verið opnað aftur og er nú opið alla daga milli kl. 13:00 og 17:00 og starfsemi veitingahússins á efri hæðinni mun hefjast á næstu dögum.

Vertarnir í kaffihúsinu Flösinni í gamla vitanum.
Vertarnir í kaffihúsinu Flösinni í gamla vitanum.

Hótelbygging.

Í sumar hefur verið unnið að byggingu hótels í Útgarði, það er fyrirtækið GSE ehf. sem stendur fyrir þeim framkvæmdum. Það hefur verið áhugavert að fylgjast með framkvæmdunum, allt í einu er húsið risið og áður en varir verður starfsemin hafin. Það er alltaf ánægjulegt þegar slíkar framkvæmdir eiga sér stað.

Allar sperrur komnar 5. júlí, fáninn blaktir af því tilefni.
Allar sperrur komnar 5. júlí, fáninn blaktir af því tilefni.

Sumarstörfin.

Mikið hefur verið um að vera hjá sumarstarfsfólki sveitarfélagsins. Byggðarlagið er mjög snyrtilegt, enda standa hendur fram úr ermum hjá okkar dugmikla starfsfólki. Ýmsar framkvæmdir hafa verið í gangi á vegum sveitarfélagsins og svo verður fram eftir árinu.

Hér eru nokkrar myndir af lífsglöðum ungmennum í sumarstörfum hjá sveitarfélaginu í sumar.

20160603_084055

Sumarstarfsfólk.

IMG_0732

Bæjarráð.

Í vikunni var fundur í bæjarráði.  Þar voru að vanda ýmis mál á dagskrá, m.a. fundargerðir nefnda og stjórna. Þar sem bæjarstjórn er í sumarleyfi frá reglulegum fundum, þá hefur bæjarráð umboð til fullnaðarafgreiðslu mála þar til bæjarstjórn tekur aftur upp þráðinn í fundahöldum í byrjun september.

Suðurnesjadagur vinnuskólanna.

Ungmenni í vinnuskólum sveitarfélaganna Garðs, Sandgerðisbæjar, Voga og Grindavíkurbæjar hittust í Garðinum í gær, fimmtudag. Svona hittingur hefur verið undanfarin ár, þar sem krakkarnir hittast og fara í ýmsa leiki og skemmta sér saman. Þá voru fyrirlestrara um málefni sem brenna á ungmennum.  Alls voru um 160 ungmenni saman komin í Garðinum og tókst þessi samvera þeirra mjög vel. Nokkur ungmenni skelltu sér í sjósund á Garðskaga, það er víst hressandi og gott !

IMG_1149 IMG_1139

Fjölgun íbúa í Garði.

Í molum 22. viku þann 3. júní sl. kom fram að íbúar samkvæmt bráðabirgðatölum þann 1. júní hafi verið 1.443 talsins, en þann 1. desember voru íbúar alls 1.425 samkvæmt upplýsingum Þjóðskrár. Sl. mánudag þann 11. júlí sýndu bráðabirgðatölur að íbúar eru alls 1.477.  Þar með hefur íbúum fjölgað um 52 frá 1. desember sl., eða um 3,6%. Þetta er ánægjuleg þróun.

Víðir á sigurbraut.

Vel hefur gengið hjá knattspyrnuliði Víðis í sumar. Liðið hefur unnið alla leiki sína utan einn og er í öðru sæti 3. deildar.  Ef þessi velgengni heldur áfram mun Víðir vinna sér sæti í 2. deild að ári og þar með munu liðsmenn færa félaginu það að gjöf á þessu afmælisári félagsins. Þá gekk vel í bikarkeppninni, en Víðir féll úr leik í 16 liða úrslitum. Næsti leikur Víðis verður á morgun, laugardag á Nesfiskvellinum í Garði kl. 16:00.  Áfram Víðir !

Víðismenn hafa oft fagnað vel í sumar.
Víðismenn hafa oft fagnað vel í sumar.

 

Góða helgi !

 

Facebooktwittergoogle_plusmail