21. vika 2016.

Árlegur fundur bæjar-og sveitarstjóra.

Í lok síðustu viku hittust bæjar-og sveitarstjórar víðs vegar að af landinu á árlegum fundi á Vestfjörðum.  Nánar tiltekið í Ísafjarðarbæ, Súðavík og Bolungarvík. Svona fundir eru mikilvægir, þar sem kollegarnir fara sameiginlega yfir ýmis mál og skiptast á upplýsingum um mál sem varða starfsemi sveitarfélaganna. Þá er ekki síður gefandi að kynnast betur þeim sveitarfélögum sem eru gestgjafar hverju sinni, gestgjafarnir fyrir vestan tóku vel á móti sínum gestum og var dvölin þar ánægjuleg og góð.

Bæjar-og sveitarstjórar í Ísafjarðarkirkju.
Bæjar-og sveitarstjórar í Ísafjarðarkirkju.

Umhverfisvika í Garði.

Í gær, fimmtudag hófst umhverfisvika í Garðinum. Íbúar og atvinnufyrirtæki eru hvött til tiltekta og snyrtingar á umhverfi sínu. Sveitarfélagið veitir móttöku á alls kyns úrgangi sem síðan fer til sorpeyðingarstöðvarinnar Kölku. Að þessu sinni er bryddað upp á þeirri nýjung að sveitarfélagið í samvinnu við Garðyrkjufélag Íslands hélt í gær fræðslufund í Gerðaskóla í tilefni umhverfisvikunnar. Þar fór m.a. fram fræðsla í máli og myndum um umhirðu lóða og garða. Fundurinn var ágætlega sóttur, garðbúar eru áhugasamir um að umhverfi sveitarfélagsins sé snyrtilegt og vel hirt, enda ber bærinn þess merki sem er ánægjulegt. Frekari upplýsingar um umhverfisvikuna í Garði er á heimasíðu sveitarfélagsins svgardur.is.

Nú verða fingur grænir í Garði.
Nú verða fingur grænir í Garði.

Bæjarráð.

Í vikunni var fundur í bæjarráði. Á dagskrá var m.a. fundargerð Öldungaráðs Suðurnesja, af fundi ráðsins með alþingismönnum þar sem fjallað var um vöntun á hjúkrunarrýmum fyrir aldraða á Suðurnesjum, sem og um önnur hagsmunamál aldraðra. Bæjarráð samþykkti samstarfsyfirlýsingu sveitarfélaganna Garðs, Sandgerðisbæjar og Reykjanesbæjar um skipulag, þróun og uppbyggingu atvinnusvæðis norðan flugstöðvar á Miðnesheiði. Framundan er mikið og mikilvægt starf um uppbyggingu þessa svæðis, sem verður líklega eitt mikilvægasta atvinnusvæði landsins. Þá voru samþykktir tveir viðaukar við fjárhagsáætlun ársins, vegna aukinna útgjalda í tengslum við kjarasamninga. Loks má nefna að bæjarráð samþykkti kauptilboð í tvær íbúðir í eigu sveitarfélagsins.

Sigurganga Víðis.

Knattspyrnulið Víðis hefur farið vel af stað nú í upphafi leiktíðar. Liðið hefur unnið báða leiki sína í 3. deild og í vikunni sigraði Víðir lið Sindra frá Hornafirði í 32 liða úrslitum bikarkeppni KSÍ. Það er ekki laust við að gamlir glampar hafi tekið sig upp í augum gamalla Víðismanna við sigurinn í bikarkeppninni, enda á Víðir glæsilegan kafla í sögu bikarkeppninnar. Nú bíða menn spenntir eftir því að dregið verði um mótherja í 16 liða úrslitum. Lið Víðis hefur litið vel út í síðustu leikjum og hefur alla burði til að gera góða hluti í sumar.  Næsti leikur Víðis í 3. deild verður á laugardag, heimaleikur gegn KFR á Nesfiskvellinum í Garði.  Áfram Víðir !

Sigurreifir Víðismenn.
Sigurreifir Víðismenn.

Uppskeruhátíð starfsfólks Íþróttamiðstöðvar.

Starfsfólk Íþróttamiðstöðvar hefur í vetur tekið þátt í fræðslu-og þjálfunarverkefni, sem er sérstaklega hannað fyrir starfsfólk sundlauga og íþróttamannvirkja. Áhersla er á verkferla, öryggismál, samskipti, þjónustu og gæði og í gær hélt starfsfólkið uppskeruhátíð við lok verkefnisins. Það er mikilvægt að starfsfólk íþróttamiðstöðva búi að þeirri þekkingu og þjálfun sem verkefnið stuðlar að, enda hefur starfsfólkið í Íþróttamiðstöðinni í Garði mikinn metnað til að  þessir hlutir allir séu í sem besta lagi. Til hamingju með þetta ágæta starfsfólk.

Heimsókn forsetaframbjóðanda.

Í vikunni leit Guðni Th Jóhannesson forsetaframbjóðandi við á bæjarskrifstofunni. Hann hefur verið á ferð um Suðurnesin síðustu daga og heimsótt vinnustaði. Það er alltaf ánægjulegt að fá frambjóðendur í heimsókn og fá tækifæri til að kynnast þeim og fá þeirra sýn á þau verkefni sem þeir sækjast eftir.

Veðrið.

Eftir norðlægar áttir, með frekar lágu hitastigi, snerist í suðlægar áttir í byrjun vikunnar. Nokkur vindur hefur fylgt, rigning og lágt hitastig. Spár gera ráð fyrir að þannig veður verði fram yfir komandi helgi. Þá verður komið fram í júní mánuð og við hljótum að gera ráð fyrir að við förum að njóta hlýrra veðurfars með tilheyrandi sumarblíðum.

Góða helgi !

Facebooktwittergoogle_plusmail

19. vika 2016.

Frábær sýning í Gerðaskóla.

Eins og fram kom í síðustu vikumolum, þá sýndu nemendur elstu bekkja Gerðaskóla söngleikin Hairspray sl. föstudagskvöld. Sýningin og framkoma nemendanna var frábær, gaman að sjá hve börnin eru efnileg og lifðu sig inn í sín hlutverk. Flottir söngvarar og vel útfærð dansatriði, ásamt staðfærðum textum gerðu sýninguna góða. Til hamingju með flott Hairspray nemendur Gerðaskóli.

Vegna fjölda áskorana var ákveðið að halda aukasýningu í kvöld, föstudag. Sýningin hefst kl. 20 í Gerðaskóla, undirritaður hvetur alla þá sem misstu af fyrri sýningunni að fjölmenna og njóta.

Myndirnar hér að neðan tók Guðmundur Sigurðsson af sýningunni Hairspray:

Hairspray3

Hairspray1

Hairspray4

Afmælishátíð Víðis.

Knattspyrnufélagið Víðir er 80 ára um þessar mundir. Sl. laugardag bauð Víðir til afmælishátíðar í íþróttahúsinu og mætti fjölmenni. Magnús Þórisson hjá Rétti og fyrrverandi knattspyrnudómari reiddi fram dýrindis mat, sem fór vel í alla. Á hátíðinn fór mest fyrir „gullaldarliði“ Víðis, flestir leikmenn sem sáu til að Víðir gerði garðinn frægan á 9. áratug síðustu aldar mættu og var mikill fagnaðarfundur meðal þeirra. Þá var „gullaldarlið“ kvenna mætt, en þær fræknu konur skipuðu lið Víðis á sínum tíma, sem gerði líka garðinn frægan. Veittar voru heiðursviðurkenningar og voru félaginu færðar gjafir. Að því loknu var skemmtidagskrá og dansiball fram eftir nóttu. Afmælishátíðin var mjög vel heppnuð, mikil og góð stemmning og greinilegt að víðishjarta slær taktfast í brjóstum margra. Stjórn og afmælisnefnd Víðis fær þakkir fyrir vel skipulagt og heppnað afmælishald, en margt verður um að vera á þessu afmælisári Víðis til að fagna þessum aldursáfanga félagsins. Nú er að bíða og sjá hvernig knattspyrnuliði meistaraflokks gengur í 3. deildinni í sumar, vonandi að þeir færi félaginu stóra afmælisgjöf með því að vinna sér sæti í 2. deild í haust.

Gullý formaður Víðis.
Gullý formaður Víðis.
Gullaldarleikmenn og forráðamenn Víðis.
Gullaldarleikmenn og forráðamenn Víðis.

Vortónleikar Tónlistarskólans.

Í gær, fimmtudag voru fyrri vortónleikar nemenda Tónlistarskólans haldnir í Útskálakirkju, að viðstöddu fjölmenni. Afar ánægjulegt er hve mikið líf er í starfsemi Tónlistarskólans, tónlistarflutningur nemendanna ber þess gott vitni. Síðari vortónleikarnir og skólaslit verða í Gerðaskóla fimmtudaginn 19. maí kl. 17:30. Nemendur tónlistarskólans koma fram við hin ýmsu tækifæri í Garðinum og er áberandi hve mikil „leikgleði“ skín af nemendunum í hvert skipti sem þeir koma fram. Hamingjuóskir til Tónlistarskóla Garðs og nemendanna fyrir frábæra starfsemi og árangur.

Bæjarráð í vikunni.

Fundur var í bæjarráði í gær, fimmtudag. Þar var fjallað um tvö erindi frá Sambandi ísl. sveitarfélaga, um uppbyggingu ferðamannastaða og um fyrirkomulag heilbrigðiseftirlits. Þá kom fram að sveitarfélagið fær greiddar tæplega 2 milljónir króna í arð frá Lánasjóði sveitarfélaga og þá var lagt fram árshlutauppgjör fyrir fyrstu 3 mánuði ársins, sem er ágætlega í takti við fjárhagsáætlun.

Ársfundur Brunavarna Suðurnesja.

Í vikunni var fyrsti ársfundur Brunavarna Suðurnesja bs, en frá og með 1. janúar 2015 voru brunavarnir reknar í formi byggðasamlags. Öll sveitarfélögin á Suðurnesjum utan Grindavíkurbæjar standa að byggðasamlaginu. Rekstur og starfsemi þetta fyrsta ár byggðasamlagsins gekk vel og er augljóst að við búum vel að öflugu og góðu slökkviliði, sem er eitt af fáum atvinnumanna slökkviliðum á landinu. Það er mikið öryggi sem felst í því fyrir íbúana og atvinnufyrirtæki á Suðurnesjum.

Samningar sveitarfélaganna fjögurra um stofnun byggðasamlags um Brunavarnir Suðurnesja voru undirritaðir af forsetum bæjarstjórna Sandgerðisbæjar, Sveitarfélagsins Garðs og Sveitarfélagsins Voga og formanni bæjarráðs Reykjanesbæjar í maí 2015. Við það tækifæri var myndin hér að neðan tekin.

Fulltrúar sveitarfélaganna bindast höndum um stofnun BS bs.
Fulltrúar sveitarfélaganna bindast höndum um stofnun BS bs.

Sumarstörfin að hefjast.

Nú styttist óðum í að hefðbundin sumarstörf hefjist hjá sveitarfélaginu. Guðbrandur íþrótta-og æskulýðsfulltrúi er klár með skipulag vinnuskólans og bíður bara eftir að börn og unglingar hefji störf hjá sveitarfélaginu. Mikið framundan í Garðinum í sumar.

Víðir í bikarnum.

Víðir vann góðan 4-1 sigur í bikarkeppni KSÍ í vikunni. Leikurinn fór fram þann 11. maí, sem er hinn formlegi stofndagur Knattspyrnufélagsins Víðis. Af því tilefni bauð félagið upp á afmælistertu í hálfleik og sá Gullý formaður um að skera tertuna. Myndin hér að neðan var tekin af því tilefni.

Gullý sker afmælistertuna.
Gullý sker afmælistertuna.

Mikil umferð á Garðskaga.

Garðskagi heillar marga og laðar að sér. Nú í vor hefur verið mikil umferð á Garðskaga, bæði eru það erlendir ferðamenn á bílaleigubílum og svo Garðbúar og gestir sem sækja Garðskagann heim. Enn er unnið að ýmsum framkvæmdum sem miða að því að auka þjónustu og afþreyingu fyrir þá sem koma á svæðið. Þar eru spennandi hlutir að gerast og von er til þess að áður en langt um líður hefjist starfsemi, til dæmis verður áhugavert að fylgjast með þegar kaffihús opnar í gamla vitanum á Garðskagatá. Því er hér með spáð að það kaffihús muni slá í gegn og að þangað sæki margir til að njóta veitinga, náttúrunnar og töfranna sem þar ríkja. Allt að gerast á Garðskaga.

Veðrið.

Veður var með ágætum um síðustu helgi, þó heldur svalt. Í byrjun vikunnar fór að hlýna, mánudagurinn einkenndist af heiðum himni, sólskini og blíðuveðri. Fram að þessu hefur verið hægviðri og milt, en sólarlítið.

Hvítasunnuhelgi.

Framundan er Hvítasunnuhelgin, sem oft hefur verið fyrsta alvöru ferðahelgin á hverju vori. Margir munu eflaust leggja land undir fót og eru ferðalangar hvattir til að fara varlega í umferðinni.

Molar í fríi í næstu viku.

Í næstu viku taka Molar frí. Bæjarstjórinn mun fara á Vestfirði eftir miðja næstu viku til fundar við aðra bæjar- og sveitarstjóra sveitarfélaga í landinu. Þetta er árlegur fundur, þar sem kollegar bera saman bækur sínar og farið er yfir ýmis sameiginleg mál. Næstu molar munu birtast föstudaginn 20. maí.

Góða helgi !

Facebooktwittergoogle_plusmail

Bæjarsjóður Garðs er skuldlaus !

Ársreikningur 2015.

Á fundi bæjarstjórnar Garðs þann 4. maí sl. var ársreikningur fyrir árið 2015 samþykktur eftir síðari umræðu.  Niðurstöður ársreikningsins eru afar ánægjulegar og bera með sér góða fjárhagslega stöðu sveitarfélagsins.

Það sem ber hvað hæst er að bæjarsjóður í A-hluta efnahagsreiknings skuldar ekki krónu af vaxtaberandi lánum hjá lánastofnunum.  Skuldir B-hluta eru aðeins 61 milljón, en að teknu tilliti til þeirra skulda auk lífeyrisskuldbindinga og leiguskuldbindinga eru skuldir og skuldbindingar sveitarfélagsins alls 519 milljónir. Skuldahlutfall samkvæmt ákvæðum Sveitarstjórnarlaga er aðeins 14,52%, en samkvæmt lögunum má skuldahlutfallið hæst vera 150% miðað við tekjur.

Þá er þeim markmiðum náð að sveitarfélagið stenst nú ákvæði Sveitarstjórnarlaga um rekstrarniðurstöðu, eða svonefnda „jafnvægisreglu“. Hún felur í sér að á hverju þriggja ára tímabili mega gjöld ekki vera umfram tekjur. Bæjarstjórn hefur undanfarin ár unnið að því að ná þessu markmiði, meðal annars með því að láta vinna úttekt á rekstri sveitarfélagsins og fylgja eftir ýmsum tillögum sem fram komu um hagræðingu í rekstri.  Sveitarfélagið hafði gert samkomulag við Eftirlitsnefnd með fjármálum sveitarfélaga um að umrædd jafnvægisregla væri uppfyllt í síðasta lagi í árslok 2017. Niðurstaðan í ársreikningi 2015 hvað þetta varðar er því afar ánægjuleg.

Heildartekjur sveitarfélagsins voru 1.158 milljónir árið 2015 og rekstrarniðurstaða skilaði 36,5 milljónum í afgang. Í fjárhagsáætlun ársins var gert ráð fyrir 18,5 milljóna afgangi.  Veltufé frá rekstri var 154 milljónir, sem er 13,3% af tekjum og handbært fé frá rekstri af alls 114 milljónir. Í sjóðstreymisyfirliti kemur fram að handbært fé jókst um 46 milljónir og var handbært fé í árslok alls 336 milljónir. Veltufjárhlutfall var 2,68, sem er mjög góð staða, þess má geta að oft er miðað við að veltufjárhlutfallið 1 sé viðunandi.

Bæjarstjórn lýsti á fundinum mikilli ánægju með niðurstöður ársreikningsins, enda full ástæða til. Það er hins vegar ljóst að til þess að halda þeirri stöðu sem fjárhagur sveitarfélagsins er kominn í núna verður að halda áfram aðhaldi í rekstri og skynsemi í fjárfestingum. Það er alþekkt að allar tilslakanir í þeim efnum koma fljótt niður á fjárhagnum og því er það krefjandi verkefni fyrir bæjarstjórn og starfsfólk sveitarfélagsins að standa vaktina og halda vel á fjármálum sveitarfélagsins á næstu árum.

Svona árangur kemur ekki af sjálfu sér. Mjög góð samstaða og samstarf hefur verið meðal allra bæjarfulltrúa við áætlanagerð og í allri umfjöllun um fjármál sveitarfélagsins að undanförnu. Það er til fyrirmyndar og á sinn þátt í því að vel gengur. Starfsfólk sveitarfélagsins á ekki síður sinn þátt í þessu og er öllu starfsfólki þakkað fyrir það. Forstöðumenn stofnana hafa unnið vel, af mikilli ábyrgð og festu, enda liggur fyrir í ársreikningnum að rekstur stofnana er mjög vel í takti við fjárhagsáætlun.

Það eru helst ýmsir utanaðkomandi þættir sem hafa afgerandi áhrif á rekstur sveitarfélaga. Þar ber fyrst að nefna kjarasamninga, en það liggur fyrir að nýgerðir kjarasamningar auka mjög launakostnað sveitarfélaga, á móti kemur að tekjur af útsvari aukast einnig. Þá má nefna framlög frá Jöfnunarsjóði sveitarfélaga, sem oft er erfitt að sjá fyrir og sveiflast oft frá ári til árs. Loks má nefna verðbólgustigið í landinu, um þessar mundir og síðustu misseri hefur verðbólga verið með minnsta móti, ekki síst í sögulegu samhengi. Það skapar mjög jákvæðar aðstæður fyrir allan rekstur og ekki síst ef litið er til verðtryggðra lána, það er því gömul saga og ný hve mikilvægt er fyrir alla að verðbólgan haldist í lágmarki.

Bæjarstjórinn er ánægður með ársreikninginn. Ég þakka bæjarstjórn fyrir afar gott og árangursríkt samstarf um fjármál sveitarfélagsins. Ekki síður fá forstöðumenn stofnana sveitarfélagsins og allir starfsmenn sveitarfélagsins þakkir fyrir vel unnin störf og góðan árangur í þeirra störfum.

 

Facebooktwittergoogle_plusmail

18. vika 2016.

Vorhátíð og Hairspray í Gerðaskóla.

Eins og fram hefur komið í mörgum molum vetrarins, þá er gjarnan mikið um að vera í Gerðaskóla. Í gær, fimmtudag var haldin vel heppnuð vorhátíð skólans, fjöldi mætti og naut uppákoma og skemmtunar af ýmsu tagi.  Í kvöld munu nemendur Gerðaskóla sýna söngleikinn Hairspray í Miðgarði og eru Garðbúar og gestir hvattir til að mæta og njóta. Mikið líf og fjör í Gerðaskóla.

Fyrirlestur um kvíða.

Á mánudaginn var boðið til fyrirlestrar í Gerðaskóla, í samstarfi Gerðaskóla og íþrótta-og æskulýðsfulltrúa. Umfjöllunarefni var kvíði og annaðist Steinunn Anna Sigurjónsdóttir sálfræðingur fyrirlesturinn. Um 90 manns mættu og tóku þátt í líflegum umræðum að loknum fyrirlestrinum. Ánægjulegt hve margir mættu, þeim var boðið upp á grillaðar pylsur í fundarhléi.

Fimleikameistari í Garði.

Það er alltaf jafn ánægjulegt þegar bætist í fjölda afreksfólks í Garðinum. Nú um daginn eignuðumst við enn einn meistarann, þegar Magnús Orri Arnarsson varð íslandsmeistari í Special Olympics flokknum í fimleikum.  Magnús æfir fimleika hjá Fimleikadeild Keflavíkur og hefur staðið sig með miklum sóma. Til hamingju með íslandsmeistaratitilinn nafni 🙂

Magnús Orri með Evu Hrund Gunnarsdóttur þjálfara sínum. (Mynd: Suðurnes.net)
Magnús Orri með Evu Hrund Gunnarsdóttur þjálfara sínum. (Mynd: Suðurnes.net)

Bæjarstjórnarfundur í vikunni.

Á miðvikudag var reglulegur fundur í bæjarstjórn Garðs. Bæjarstjórn samþykkti ársreikning sveitarfélagsins fyrir árið 2015 eftir síðari umræðu og lýsti bæjarstjórn ánægju með niðurstöður ársreikningsins. Þá voru á dagskrá fundargerðir nefnda sveitarfélagsins, auk fundargerða af samstarfsvettvangi sveitarfélaganna á Suðurnesjum.

Keppnistímabil knattspyrnumanna hafið.

Nú er leiktíðin gengin í garð hjá Víði. Fyrsti leikur var sl. laugardag, en þá bar Víðir sigurorð af ÍH í bikarkeppni KSÍ, Borgunarbikarnum. Fyrsti leikur Víðis í 3. deild verður mánudaginn 16. maí gegn nágrönnum okkar í Reyni Sandgerði. Góð byrjun hjá Víðismönnum, gefur vonandi góð fyrirheit um framhaldið.

Víðir 80 ára.

Á morgun, laugardag verður haldið upp á stórafmæli Knattspyrnufélagsins Víðis, en félagið er 80 ára. Búist er við fjölmenni í afmælishófið, sem verður mjög glæsilegt og myndarlegt að hætti Víðis. Knattspyrnufélagið Víðir er samfélaginu í Garði mjög mikilvægt, ekki aðeins hvað varðar íþróttirnar heldur hafa félagar í Víði staðið að alls konar samkomum, skemmtunum og uppákomum í Garðinum mörg undanfarin ár. Forystufólk félagsins í nútíð og fortíð fær innilegar þakkir fyrir þeirra framlag til samfélagsins í Garði gegnum tíðina.

Víðir 80 ára.hátíðardagskrá

Vorboðarnir.

Við fáum ár hvert ýmis kennimerki þess að vorið komi og að sumartíðin gangi í garð. Sem dæmi um það má nefna vorkomu Lóunnar og Sumardaginn fyrsta. Nú í byrjun vikunnar hófst tímabil strandveiða smábáta, það má eins vel skilgreina þau tímamót sem vorboða. Hér áður fyrr var það merki um vorkomuna þegar trillukarlarnir byrjuðu að dytta að bátum sínum, skrapa og mála gömlu trétrillurnar og svo setja á flot með mikilli viðhöfn. Nú í vikunni birtist enn einn vorboðinn, en þá sá Ásgeir Hjálmarsson fyrstu kríuna þetta vorið, þar sem hún flaug yfir Kríulandinu og á það vel við. Sumir halda því fram að sumarið komi með kríunni.

Krían yfir Kríulandi !
Krían yfir Kríulandi !

Veðrið.

Þessi vika hófst með ágætu veðri, norðlægri átt og sólskini en ekki miklum hlýindum. Um miðja vikuna og fram að þessu hafa verið nokkuð svalar norðanáttir með vindi, en sólin hefur skinið á köflum. Veðurfræðingar eru farnir að lofa breytingum um og upp úr helginni, með hlýnandi veðri. Vonandi stenst það !

Góða helgi !

 

Facebooktwittergoogle_plusmail