Við lok árs 2015.

Áramót eru jafnan merkileg tímamót, þá er tilfinningin gjarnan sú að tilveran sé núllstillt. Litið er til baka yfir farinn veg, nýr kafli hefst og ákveðin spenna fylgir því að hefja nýtt ár með nýjum áskorunum.  Ef litið er til baka yfir liðið ár kemur jafnan ýmislegt athyglisvert í ljós, sumt hefur hreinlega gleymst en annað er eins og ljóslifandi í hugskotinu.

Molar úr molum.

Undir lok febrúar 2015 hóf bæjarstjóri að skrifa Mola úr Garði. Markmiðið með Molum var að birta þar vikulega pistla þar sem fjallað væri um viðburði og annað sem tengist lífinu og tilverunni í Garðinum, ásamt því að koma á framfæri upplýsingum af vettvangi sveitarfélagsins. Vikupistlarnir hafa birst á föstudögum og sá fyrsti kom fram í lok 9. viku þann 27. febrúar. Auk vikumola hafa birst molar um sérstök umfjöllunarefni, sá fyrsti 23. febrúar þegar Molar úr Garði voru kynntir til sögunnar. Þegar farið er yfir alla molana þá kemur í ljós að margt hefur átt sér stað í Garðinum á liðnu ári, en eflaust má tína til einhverja mola sem sem féllu út af en hefðu átt fullt erindi í vikupistla.

Vikupistlar.

Umfjöllun um veðurfar er klassísk á Íslandi. Í vikupistlum hefur nokkuð verið fjallað um veðrið, sem var erfitt og leiðinlegt framan af árinu og þá sérstaklega yfir vetrarmánuðina.

Um mánaðamótin janúar/febrúar var ný og glæsileg líkamsræktaraðstaða í íþróttamiðstöðinni tekin í notkun. Þar hefur verið mikil aðsókn og má glöggt sjá að vaxtarlag margra hefur breyst til hins betra á árinu. Íþróttamiðstöðin býður upp á glæsilega og góða aðstöðu, með 25 m sundlaug ásamt tveimur heitum pottum, vatnsgufu og rennibraut, auk íþróttasalar í fullri stærð og hinni glæsilegu líkamsræktaraðstöðu.

Upprennandi körfuboltahetjur í Garði.
Upprennandi körfuboltahetjur í Garði.

Skólalífið í Garði er mjög blómlegt og margir skemmtilegir viðburðir hafa verið í skólunum. Það á jafnt við um Gerðaskóla, leikskólann Gefnarborg og Tónlistarskólann. Um mitt árið var ráðinn nýr skólastjóri og aðstoðarskólastjóri við Gerðaskóla, í haust tók nýr leikskólastjóri til starfa í leikskólanum Gefnarborg.

Sumarhátíð leikskólans
Sumarhátíð leikskólans

Á árinu hafa verið nokkrir menningarviðburðir. Hið árlega þorrablót var í upphafi Þorra í janúar sl., þar mætti mikill fjöldi manns, þorrablótið í Garði er það fjölmennasta á Suðurnesjum. Í lok júní var Sólseturshátíð, með ýmsum skemmtilegum uppákomum og myndarlegri dagskrá. Fjölskyldu-og menningarvika var haldin í byrjun nóvember, með dagskrá alla þá vikuna. Nú um miðjan desember hófst listahátíðin Ferskir vindar, sem mun standa fram eftir janúar með þátttöku yfir 50 listamanna víðs vegar að úr heiminum. Auk þessara viðburða mætti nefna marga aðra, t.d. norræna bókasafnsviku, safnahelgi á Suðurnesjum, starfsemi Hollvina Unu í Sjólyst, konu-og herrakvöld Víðis, skötuveisluna í júlí o.m.fl. Það er mikið um að vera á menningarsviðinu í Garði.

Konur í sundlaugarpartýi á Sólseturshátíð.
Konur í sundlaugarpartýi á Sólseturshátíð.
Lína Langsokkur og leikskólabörn á Sólseturshátíð
Lína Langsokkur og leikskólabörn á Sólseturshátíð
Sólsetur á Garðskaga 25. júní.
Sólsetur á Garðskaga 25. júní.

Félagslífið er ekki síður blómlegt. Mikið og kraftmikið starf er í Auðarstofu, þar sem er félagsstarf eldra fólks í Garðinum. Knattspyrnufélagið Víðir stendur fyrir öflugu starfi og er aðdáunarvert hve mikið sjálfboðaliðastarf á sér stað í félaginu. Víðir annast ásamt Björgunarsveitinni Ægi þorrablótið, Víðir er framkvæmdaraðili Sólseturshátíðar, félagið hélt herrakvöld og sérlega glæsilegt og vel sótt konukvöld, Unglingaráðið bauð upp á skötuveislu fyrir jólin og aðalstjórnin bauð styrktaraðilum í hangikjötsveislu á Aðventu. Auk alls þessa heldur Víðir úti öflugu íþróttastarfi þar sem knattspyrnan er megin viðfangsefnið. Björgunarsveitin Ægir heldur uppi öflugu starfi og er mikilvægur hlekkur í  öryggismálum samfélagsins, sem ber að þakka. Auk þessa má nefna starf Kvenfélagsins Gefnar, sem er líka mikilvægur hlekkur í samfélaginu. Hollvinir Unu annast varðveislu Sjólystar og innbús Unu Guðmundsdóttir. Auk þessa starfar Kiwanisklúbburinn Hof, og ekki má gleyma Söngsveitinni Víkingunum sem yljuðu Garðbúum oft um hjartarætur með söng sínum á árinu. Félagslíf barna og unglinga tengist að miklu leyti skólastarfinu og öflugt og fjölbreytilegt starf er í Félagsmiðstöðinni Eldingu.

Sviðaveisla í Auðarstofu
Sviðaveisla í Auðarstofu
Kynjaverur á hrekkjavökudiskó í Eldingu
Kynjaverur á hrekkjavökudiskó í Eldingu
Regnboginn yfir Víði
Regnboginn yfir Víði

Starfsemi sveitarfélagsins var í föstum skorðum á árinu og það sinnir vel þeirri þjónustu við íbúanna sem því ber að veita. Það er jafnan forvitnilegt og spennandi að fylgjast með þróun íbúafjölda í hverju sveitarfélagi. Um síðustu áramót voru skráðir 1.425 íbúar í Garði, þeim fjölgaði á tímabili upp úr miðju ári en fækkaði aftur þegar leið á árið. Samkvæmt bráðabirgðatölum Þjóðskrár voru 1.425 íbúar skráðir í sveitarfélaginu nú í síðustu viku ársins. Þar með hefur íbúafjöldinn staðið í stað frá upphafi ársins, vonandi mun rætast úr því á nýju ári og eru nýir íbúar boðnir velkomnir í Garðinn.

Ýmislegt af vettvangi bæjarstjórnar hefur verið til umfjöllunar í molum. Sagt hefur verið frá helstu málum á fundum bæjarráðs og bæjarstjórnar. Þá var farið yfir helstu niðurstöður ársreiknings 2014 og fjárhagsáætlunar 2016. Þær bera með sér góðan efnahag sveitarfélagsins og að rekstur þess er í ágætu jafnvægi.

Bæjarstjórn Garðs ásamt bæjarstjóra
Bæjarstjórn Garðs ásamt bæjarstjóra

Molar um einstök málefni.

Á árinu birtust nokkrir molar þar sem fjallað var um sérstök málefni. Í febrúar var fjallað um stefnumótun bæjarstjórnar um uppbyggingu atvinnulífs og ferðaþjónustu í Garði.  Þar kemur m.a. fram að Garður sé  „bær hafsins og norðurljósa“.

Norðurljósin yfir Garðskaga
Norðurljósin yfir Garðskaga

Í febrúar voru molar með umfjöllun um Skagagarðinn mikla, sem er mjög merkilegt fyrirbæri í sögu Garðs. Talið er að garðurinn hafi verið hlaðinn um 10.  öld, hann hafi verið allt að 1.500 metra langur.

Í mars var fjallað um Unu í Sjólyst, völvu Suðurnesja. Í sama mánuði voru molar með yfirskriftinni „Vorboðinn í Garðsjónum“, en tilefni þess var að frá glugganum á skrifstofu bæjarstjórans blöstu við smábátar sem höfðu hafið róðra á Garðsjóinn undir lok mars.

Una í Sjólyst
Una í Sjólyst

Í apríl fjölluðu molar um skemmtilega heimsókn sem bæjarstjórinn fékk. Þar voru á ferð nokkrir ungir og efnilegir knattspyrnumenn í leikskólanum. Þeir komu á framfæri kvörtun um að fótboltasvæðið á leikskólalóðinni væri ónýtt og þyrfti að laga. Bæjarstjórinn tók erindinu vel og var fótboltavöllurinn á leikskólalóðinni lagaður sl. sumar.

Knattspyrnumenn úr leikskólanum í heimsókn hjá bæjarstjóra.
Efnilegir knattspyrnumenn í leikskólanum í heimsókn hjá bæjarstjóra.

Í maí hélt Una María Bergmann glæsilega burtfarartónleika frá Tónlistarskólanum í Garði í Útskálakirkju. Tónleikarnir voru síðari hluti framhaldsprófs hennar frá tónlistarskólanum. Fjallað var um tónleikana í sérstökum mola.

Una María Bergmann mezzosópran
Una María Bergmann mezzosópran

Í júní voru sérstakir molar tileinkaðir hátíðahöldum í Garðinum. Annars vegar var umfjöllun um Sólseturshátíð sem þá stóð yfir, einnig var fjallað um sumarhátíð leikskólans.

Fjölmargt fleira mætti nefna, en að öðru leyti fela Molar úr Garði í sér ákveðinn annál ársins 2015 og er forvitnilegt að renna gegnum alla molana, þótt svo þar komi ekki fram allt það sem átti sér stað í Garðinum á árinu. Molarnir halda áfram á nýju ári og munu að ári fela í sér annál næsta árs.

 

Ég óska Garðbúum og landsmönnum öllum farsældar á nýju ári, með þökk fyrir samfylgdina á því ári sem nú er að renna sitt skeið á enda.

new-years-eve-sedona

 

Magnús Stefánsson, bæjarstjóri.

 

Facebooktwittergoogle_plusmail

51. vika 2015.

Þessi vika hefur borið einkenni þess að jólahátíðin er að ganga í garð.  Ýmsir viðburðir hafa verið í Garðinum sem tengjast jólunum. Menning og listir blómstra í Garðinu, eins og fram kemur í þessum molum.

Nú í morgun komu nemendur Tónlistarskólans í heimsókn á bæjarskrifstofuna og léku nokkur jólalög.

Tónlistarmenn í heimsókn á bæjarskrifstofu.
Tónlistarmenn í heimsókn á bæjarskrifstofu.

Hangikjötsveisla Víðis.

Sl. föstudag bauð Knattspyrnufélagið Víðir styrktaraðilum og velunnurum í hangikjötsveislu í félagsheimili Víðis. Þetta er árviss viðburður þar sem Víðir þakkar fyrir sig. Fjölmenni naut hangikjötsins og var að vanda gerður góður rómur að góðgætinu.

Tónleikar í Útskálakirkju.

Sl. sunnudag voru tvennir tónleikar í Útskálakirkju. Annarsvegar jólatónleikar á vegum kirkjunnar og um kvöldið voru styrktartónleikar Hollvina Unu. Fram komu ýmsir góðir listamenn á báðum tónleikunum, sem voru vel sóttir. Þá voru veitt verðlaun í ljóðasamkeppni Hollvina Unu. Fyrstu verðlaun hlaut Amelía Björk Davíðsdóttir, 12 ára nemandi við Gerðaskóla.

Jólatónleikar Tónlistarskólans.

Tónlistarskólinn í Garði hélt árvissa jólatónleika í Miðgarði í Gerðaskóla í vikunni. Það var ánægjulegt að hlýða á tónlist nemendanna og gaman að sjá hve góðum árangri tónlistarskólinn er að skila inn í tónlistarlífið í Garði. Fram komu nemendur á öllum aldri og af öllum stigum tónlistarnámsins. Leikið var á margskonar hljóðfæri og einnig hljómaði ljúfur söngur.

Jólatónleikar Tónlistarskólans
Jólatónleikar Tónlistarskólans

Ferskir vindar.

Listahátíðin Ferskir vindar hófst í vikunni. Fyrstu listamennirnir komu í Garðinn í byrjun vikunnar og nú er listsköpun þeirra hafin af fullum krafti. Það verður fróðlegt að fylgjast með listamönnunum að störfum á næstu vikum, en sýningar verða í byrjun janúar. Upplýsingar um listahátíðina má nálgast á heimasíðu Ferskra vinda, fresh-winds.com.

Skötuveisla Víðis.

Það er hefð fyrir því að Unglingaráð Víðis bjóði upp á skötuveislu rétt fyrir jólin. Í hádeginu í dag, föstudag mætti fjöldi manns í skötuveisluna í Samkomuhúsinu. Veisluhöldum verður fram haldið í kvöld. Skatan var ljúffeng og góð stemmning var meðal veislugesta.

Jólafrí.

Nú fara Molar í jólafrí, þar með eru þessir vikumolar þeir síðustu á þessu ári. Ég óska öllum gleðilegra hátíða, bæði um jól og áramót. Næstu vikumolar koma á nýju ári.

Góða helgi !

 

Facebooktwittergoogle_plusmail

50. vika 2015.

Óveðrið og björgunarsveitirnar.

Eins og alkunna er gekk mikið óveður yfir landið í byrjun vikunnar. Garðurinn slapp sem betur fer vel frá óveðrinu, versta veðrið náði ekki til okkar.

Íslensku björgunarsveitirnar eru einstakar og við búum vel að því eiga jafn öfluga sveit björgunarsveitafólks og raun ber vitni. Það er líka einstakt að þvílíkur fjöldi fólks sé tilbúinn til að leggja af mörkum þá miklu vinnu og oft hættulega, sem björgunarsveitarfólk gerir á Íslandi, allt í sjálfboðavinnu. Við í Garðinum búum svo vel að eiga okkar björgunarsveit, en félagar í Björgunarsveitinni Ægi í Garði stóðu vaktina meðan þurfa þótti. Það vekur öryggistilfinningu að vita af björgunarsveitarfólki á vaktinni við svona aðstæður, fyrir það er þakkað af heilum hug.

Merki Björgunarsveitarinnar Ægis í Garði
Merki Björgunarsveitarinnar Ægis í Garði

Bókasafnið.

Við búum vel að góðu bókasafni í Garði. Í bókasafninu er mikið af góðum bókum sem höfða til allra hópa. Þessa dagana kemur hluti af jólabókaflóðinu í bókasafnið í Garði og eru Garðbúar hvattir til þess að nýta sér góða þjónustu bókasafnsins, leigja sér bók og leggjast í lestur.

Tónleikar Hollvina Unu í Sjólyst.

Á sunnudaginn, þann 13. desember verða fjáröflunartónleikar Hollvina Unu haldnir í Útskálakirkju og hefjast kl. 20:00. Á tónleikunum koma fram góðir listamenn og aðgangseyrir rennur óskiptur til starfseminnar í Sjólyst. Bæjarstjóri hvetur garðbúa og gesti til að fjölmenna á tónleikana, njóta góðrar dagskrár og styrkja starfsemina í Sjólyst.

Ferskir vindar.

Í næstu viku hefst listahátíðin Ferskir vindar. Fjöldi erlendra listamanna mun taka þátt í hátíðinni og munu þeir fara að koma í Garðinn upp úr miðri næstu viku, hátíðin mun standa til loka janúar 2016. Að undanförnu hefur verið mikil vinna við að undirbúa komu listamannanna. Listahátíðin Ferskir vindar er í senn skemmtilegur og athyglisverður atburður sem hefur m.a. vakið mikla athygli víða erlendis. Nánari upplýsingar um hátíðina munu koma fram á næstu dögum. Framundan er mikil listaveisla í Garði.

Góða helgi !

 

Facebooktwittergoogle_plusmail

49. vika 2015.

Jólaljósin tendruð á jólatrénu.

Sl. sunnudagur markaði upphaf Aðventunnar og samkvæmt hefðinni voru ljósin tendruð á jólatrénu í miðbænum þann dag. Fjöldi garðbúa og gesta var viðstaddur, enda góð og hátíðleg dagskrá. Það er hefð fyrir því að afmælisbarn dagsins tendri ljósin, að þessu sinni var það Máney Dögg Másdóttir sem var eitt af afmælisbörnum sunnudagsins. Barnakór tónlistarskólans og Gerðaskóla söng nokkur lög, sem og söngsveitin Víkingarnir. Tveir rauðklæddir og hvítskeggjaðir bræður mættu, rifjuðu upp jólalögin og skemmtu börnunum, reyndar virtust margir fullorðnir hafa gaman að og fundu barnið í sér. Aðventan er gengin í garð og jólahátíðin framundan.

Jólasveinarnir eru komnir til byggða
Jólasveinarnir eru komnir til byggða

Jólabasar kvenfélagsins.

Kvenfélagið Gefn hélt sinn árlega jólabasar fyrsta sunnudag í Aðventu. Þar var ýmislegt fallegt í boði og var salan góð. Kvenfélagið Gefn í Garði er eins og önnur kvenfélög á Íslandi, mikilvægur hlekkur í samfélaginu.

Kvenfélagskonur kátar á jólabasar í Garði
Kvenfélagskonur kátar á jólabasar í Garði

Bærinn að klæðast búningi jólanna.

Húseigendur í Garði hafa að undanförnu komið upp jólaskreytingum og ljósum á hús sín og í garða. Það lífgar upp á bæinn og veitir ánægju.

Eitt af mörgum jólahúsum í Garði
Eitt af mörgum jólahúsum í Garði

Bæjarstjórnarfundur.

Í vikunni var síðasti fundur bæjarstjórnar á þessu ári. Aðal mál fundarins var afgreiðsla fjárhagsáætlunar fyrir næsta ár. Áætlunin kemur ágætlega út og ber merki um góða fjárhagsstöðu sveitarfélagsins. Rekstrarafgangur er áætlaður 17,7 milljónir króna, fjárfestingar og framkvæmdir eru áætlaðar 65,2 milljónir. Efnahagur sveitarfélagsins er traustur og skuldir litlar. Sveitarfélagið skuldar lánastofnunum aðeins rúmar 60 milljónir og er hlutfall skulda og skuldbindinga rúmlega 40% miðað við tekjur, það hlutfall má hæst vera 150% samkvæmt lögum. Rekstur og fjármál sveitarfélagsins eru í góðum farvegi, til að fara ekki út af sporinu í þeim efnum þarf áframhaldandi aðhald í rekstri og að skynsemi ráði við ákvarðanir um ráðstöfun fjármuna.

Snyrtilegasta húsið í Garði.

Undir lok sumars valdi Umhverfisnefnd Garðs Skólabraut 11 sem snyrtilegasta húsið í Garði árið 2015. Eigendur eru Theodór Guðbergsson og Jóna Hallsdóttir. Af því tilefni hefur Umhverfisnefnd afhent þeim viðurkenningu, sem er steinn skreyttur af Ástu Óskarsdóttur.

Bæjarstjóri óskar þeim Jónu og Theodór til hamingju með viðurkenninguna, með þökk fyrir að sýna frumkvæði og metnað við að viðhalda sinni eign snyrtilegri.

Jóna og Theodór með viðurkenningu fyrir snyrtilegasta húsið 2015, ásamt Brynju form. Umhverfisnefndar og Einari Friðrik hjá Umhverfis-, Skipulags-og byggingarsviði.
Jóna og Theodór með viðurkenningu fyrir snyrtilegasta húsið 2015, ásamt Brynju form. Umhverfisnefndar og Einari Friðrik hjá Umhverfis-, Skipulags-og byggingarsviði.

Hver er staðan ?

Í gær, fimmtudag boðaði Heklan, Atvinnuþróunarfélag Suðurnesja til fundar í Hljómahöllinni undir yfirskriftinn „Hver er staðan ?“. Þar voru flutt nokkur áhugaverð erindi um stöðu og horfur í atvinnu- og menntamálum á Suðurnesjum. Skúli Mogensen forstjóri WOW fór yfir stöðuna og framtíðarhorfur hjá sínu fyrirtæki, þar með um fyrirsjáanleg mjög aukin umsvif í flugstarfsemi og fjölgun ferðafólks á næstu árum. Þá má nefna að Kristján Hjálmarsson hjá HN markaðssamskiptum fór yfir viðhorfskönnun sem m.a. gefur til kynna hvernig ímynd Suðurnesja er. Auk þeirra voru erindi um athyglisverða starfsemi Codland í Grindavík, framboð á starfs-og verkmenntun á Suðurnesjum, ásamt því að fjallað var um upplifun gesta og mikilvægi mannauðs, ekki síst í ferðaþjónustu.

Það er deginum ljósara að ef litið er til erindis Skúla, þá eru Suðurnesin í dauðafæri hvað varðar ferðaþjónustu og aukin umsvif í atvinnustarfsemi. Helsta áhættan í þeim efnum er að nýta ekki tækifærin og trompin sem við höfum á hendi. Lykilatriði í því er samstaða og samvinna, bæði innan Suðurnesja og hjá stjórnvöldum. Erindi Skúla var athyglisvert og í því fólst áskorun á alla aðila um að vinna saman að því að spila rétt úr trompunum. Þá er einnig ljóst af erindi Kristjáns að við eigum verk að vinna við að bæta ímynd Suðurnesja og kveikja áhuga fólks á því að horfa til Suðurnesja með atvinnu og búsetu. Þar virðist helst vanta upp á fræðslu um ágæti svæðisins og þeirra tækifæra sem hér liggja. Það er sannarlega verk að vinna, við höfum trompin á hendi og áskorunin felst í að nota þau rétt.

Veðrið.

Um miðja vikuna gerði áhlaupsveður, með þónokkurri snjókomu. Snjókoman hélt áfram og ekki hefur oft verið jafn mikill snjór í Garðinum undanfarin ár og nú í upphafi Aðventu. Snjórin skapar ákveðna stemmningu á Aðventunni, en hin hliðin snýr að erfiðri færð og snjómokstri. Svona er Ísland og á þessum árstíma má að sjálfsögðu alltaf búast við svona veðurfari. Veðurspáin fyrir daginn í dag og á morgun er ekki góð, molar hvetja landann til að fylgjast vel með veðurspám og fara varlega í umferðinni.

Góða helgi !

Facebooktwittergoogle_plusmail

48. vika 2015.

Íbúafundur.

Sl. mánudag var haldinn íbúafundur í Gerðaskóla. Á dagskrá var kynning á fjárhagsáætlun 2016 og fjárhag sveitarfélagsins. Síðari hluti fundarins var kynning á hugmyndum og áformum um uppbyggingu ferðaþjónustu á Garðskaga. Fundurinn var vel sóttur af um 50 fundarmönnum og fóru fram góðar og uppbyggilegar umræður um málefni sveitarfélagsins.

Nokkrir fundarmenn á íbúafundi 23.11.2015
Nokkrir fundarmenn á íbúafundi 23.11.2015

Bæjarráðsfundur.

Í gær, fimmtudag var fundur í bæjarráði og var aðalefni fundarins fjárhagsáætlun 2016. Bæjarráð samþykkti gjaldskrá og ýmsar ráðstafanir í tengslum við fjárhagsáætlunina, auk þess að vísa fjárhagsáætlun til síðari umræðu í bæjarstjórn í næstu viku.  Niðurstöður fjárhagsáætlunar eru ágætar og munu Molar fara nánar yfir það eftir að bæjarstjórn hefur afgreitt fjárhagsáætlunina. Fjárhagur og rekstur sveitarfélagsins er í góðu horfi.

Auk fjárhagsáætlunar fjallaði bæjarráð um samkomulag við væntanlega rekstraraðila ferðaþjónustu á Garðskaga og var bæjarstjóra veitt heimild til þess að ganga frá því samkomulagi fyrir hönd sveitarfélagsins. Spennandi verkefni framundan á Garðskaga.

Sjónvarpsviðtal við Víkurfréttir.

Sjónvarp Víkurfrétta tók viðtal við bæjarstjórann í vikunni og var það sýnt í gærkvöldi á sjónvarpsstöðinni ÍNN. Umræðuefnið var uppbygging ferðaþjónustu á Garðskaga. Þar eru spennandi hlutir á ferðinni og vonandi mun það allt saman ganga upp, enda sækir mikill fjöldi ferðamanna Garðskaga heim á hverju ári og þá ekki síst yfir vetrartímann. Norðurljósin eru eitt megin aðdráttaraflið yfir veturinn, enda er Garðskagi einn besti staður landsins til að njóta norðurljósa. Garðurinn er bær norðurljósanna.

Þessa mögnuðu mynd tók Jóhann Ísberg af norðurljósum yfir Garðskaga, en Jóhann er einn þeirra sem vinna að uppbyggingu ferðaþjónustu á Garðskaga.

Norðurljósin yfir Garðskaga
Norðurljósin yfir Garðskaga

Kveikt á jólatré á sunnudaginn.

Næsta sunnudag verður kveikt á jólatrénu, með tilheyrandi dagskrá. Þessi atburður er fastur liður í upphafi Aðventu og markar upphaf jólastemmningar í Garði. Hefð er fyrir því að afmælisbörn dagsins kveiki á jólaljósunum á jólatrénu. Nánar má sjá dagskrá á heimasíðunni svgardur.is. Bæjarstjóri hvetur garðbúa til að fjölmenna, njóta samveru og þeirrar dagskrár sem í boði verður.

Góða helgi !

 

Facebooktwittergoogle_plusmail

47. vika 2015.

Heimsókn í Nesfisk

Bæjarstjórn og bæjarstjóri heimsóttu hið myndarlega og öfluga sjávarútvegsfyrirtæki Nesfisk í vikunni. Stjórnendur fyrirtækisins tóku vel á móti gestunum, kynntu starfsemina og leiddu gestina um fyrirtækið. Nesfiskur er vel rekið fyrirtæki og í hópi stærstu sjávarútvegsfyrirtækja í landinu. Starfsmenn eru vel á fjórða hundrað, sjómenn og landverkafólk og fyrirtækið er með vinnslu á þremur stöðum, í Sandgerði og Hvammstanga auk Garðsins. Nesfiskur hefur á undanförnum árum byggt upp glæsilega aðstöðu í Garði, sem er fyrirtækinu til mikils sóma. Bæjarstjóri þakkar fyrir góðar móttökur og áhugaverða kynningu á starfsemi fyrirtækisins. Bæjarstjórn hyggur á fleiri heimsóknir til fyrirtækja í Garði á næstunni, enda er mikilvægt að bæjaryfirvöld séu í góðu sambandi við atvinnulífið í sveitarfélaginu.

Stjórnendur Nesfisks í nýju glæsilegu skrifstofuhúsnæði
Stjórnendur Nesfisks í nýju glæsilegu skrifstofuhúsnæði

Fjárhagsáætlun og íbúafundur.

Nú er verið að leggja lokahönd á fjárhagsáætlun næsta árs. Bæjarstjórn mun afgreiða fjárhagsáætlunina við síðari umræðu á bæjarstjórnarfundi 2. desember. Nk. mánudag verður íbúafundur í Gerðaskóla þar sem farið verður yfir fjárhag og áætlanir sveitarfélagsins. Á íbúafundinum verða einnig kynntar hugmyndir og áform um starfsemi og rekstur ferðaþjónustu á Garðskaga. Bæjarstjóri hvetur garðbúa til að mæta á íbúafundinn og ræða málefni sveitarfélagsins.

Veðrið.

Haustið hefur verið þokkalegt, en þó með talsverðum rigningum. Nú síðustu daga hefur kólnað aðeins í veðri og þegar þessar línur eru skrifaðar er lítilsháttar snjókoma í Garðinum, rétt til þess að lita jörðina hvíta. Þrátt fyrir allt hefur veðrið verið ágætt að undanförnu og vonandi heldur það áfram á næstunni.

Facebooktwittergoogle_plusmail

46. vika 2015.

Mikið um að vera í Auðarstofu.

Í Auðarstofu fer fram félagsstarf fyrir garðbúa sem náð hafa 60 ára aldri, í myndarlegu og góðu húsnæði í eigu sveitarfélagsins. Þar er jafnan mikið um að vera, vel mætt og þátttaka í starfinu er góð. Þann 28. október sl. var haldin mikil sviðaveisla þar sem þeir sem mættu klæddust bleikum litum og margir höfðu hatta á höfði.  Þá var handavinnusýning og vöfflukaffi fyrir stuttu, þar sem mættu um 200 gestir og vöfflur voru borðaðar af um 120 manns.

Það er ánægjulegt hve kröftugt og uppbyggilegt starf á sér stað í Auðarstofu.

Sviðaveisla í Auðarstofu
Sviðaveisla í Auðarstofu
Hópurinn í sviðaveislunni í Auðarstofu.
Hópurinn í sviðaveislunni í Auðarstofu.

Norræn bókasafnavika.

Bókasafnið í Garði og Norræna félagið í Garði standa saman að þátttöku í Norrænni bókasafnaviku þessa vikuna. Þema vikunnar er vinátta. Á skólabókasafninu hefur þessa vikuna verið kynning á norrænum barna-og unglingabókum, ásamt því að lesið hefur verið úr völdum bókum. Í gær, fimmtudag las Hrafn A Harðarson bókasafnsfræðingur upp úr Íslendingasögunum.

Vakin er athygli á því að í bókasafninu í Garði eru til fjölmargar bækur eftir norræna höfunda fyrir bæði börn og fullorðna. Garðbúar eru hvattir til þess að kynna sér þær og njóta þess að lesa norrænar bókmenntir.

Fjölskyldu og menningarvika.

Í síðustu viku stóð yfir Fjölskyldu-og menningarvika í Garði, þetta var í fyrsta skipti sem slík dagskrá hefur verið í Garði. Fjölmargt áhugavert var á dagskrá vikunnar og var þátttaka ágæt. Eftir reynsluna af síðustu viku má gera ráð fyrir að Fjölskyldu-og menningarvika verði endurtekin á næsta ári. Bæjarstjórinn þakkar öllum þeim sem stóðu að undirbúningi og framkvæmd dagskrárinnar fyrir vel unnin störf.

Körfuboltaæfingar fyrir börn.

Þau Bára Bragadóttir og Óli Garðar Axelsson áttu frumkvæði að því að hefja körfuboltaæfingar fyrir börn í 3.-6. bekk grunnskólans. Fyrstu æfingar voru fyrir nokkrum dögum og er aðsóknin mjög góð. Hver veit nema framtíðar körfuboltastjörnur séu að stíga sín fyrstu skref í íþróttahúsinu í Garði þessa dagana. Bæjarstjórinn þakkar þeim Báru og Óla fyrir frumkvæðið og vonast til að æfingar gangi vel.

Upprennandi körfuboltahetjur í Garði.
Upprennandi körfuboltahetjur í Garði.
Bára og Óli Garðara körfuboltafrömuðir.
Bára og Óli Garðar körfuboltafrömuðir.

Fjárhagsáætlun.

Nú stendur sem hæst vinna við fjárhagsáætlun sveitarfélagsins fyrir næsta ár og rammaáætlun fyrir næstu þrjú ár þar á eftir. Samkvæmt sveitarstjórnarlögum skal lokið við afgreiðslu fjárhagsáætlunar fyrir 15.desember. Fjárhagsáætlun sveitarfélagsins verður afgreidd eftir síðari umræðu í bæjarstjórn 2.desember. Eftir hagræðingaraðgerðir síðustu tvö ár er ágætt útlit fyrir viðunandi niðurstöðu áætlunarinnar.

Tekjur af útsvari er einn mikilvægasti tekjustofn sveitarfélagsins og hafa útsvarstekjur vaxið nokkuð á þessu ári og gera má ráð fyrir að sú þróun haldi áfram á næsta ári. Í fjárhagsáætlun ársins 2015 voru tekjur af útsvari áætlaðar um 530,5 milljónir króna, í útkomuspá fyrir árið 2015 er áætlað að útsvarstekjur verði um 561,6 milljónir. Í áætlun Sambands íslenskra sveitarfélaga er gert ráð fyrir að útsvarstekjur sveitarfélagsins verði um 608,7 milljónir króna árið 2016.  Áætlaðar útsvarstekjur eru því 8,9% meiri í áætlun fyrir árið 2016 en gert er ráð fyrir að verði árið 2015.  Þessi þróun er ánægjuleg og er nokkuð í takti við jákvæða þróun í atvinnumálum á Suðurnesjum.

Bæjarstjórn mun boða til íbúafundar mánudaginn 23. nóvember kl. 20:00 í Miðgarði í Gerðaskóla, þar sem farið verður yfir fjárhag og fjárhagsáætlun sveitarfélagsins fyrir næsta ár.

Herrakvöld Víðis.

Karlar fjölmenntu á herrakvöld Víðis sl. laugardagskvöld. Kvöldið tókst vel, góð mæting og mikil gleði. Ekki hefur tekist að nálgast myndir af herrakvöldinu til birtingar, hvort sem það er vegna þess að þær þyki ekki birtingarhæfar eða hvort yfir höfuð hafi ekki verið teknar neinar myndir. Hvað sem því líður þá er mikilvægt fyrir Víðir að herrakvöldið tókst vel og að félagið hafi náð að safna einhverjum aurum til rekstrar félagsins.

Veðrið.

Veðrið í haust hefur að miklu leyti verið ágætt, en þó hefur tíðin einkennst af rigningum. Nú er einhver breyting að verða, hitastig fer lækkandi og vart hefur orðið við snjókomu, él og ísaðar götur, sem má telja eðlilegt miðað við hve stutt er til Jóla !

 

Góða helgi !

 

 

Facebooktwittergoogle_plusmail

45. vika 2015.

Fjölskyldu-og menningarvika í Garði.

Þessi vika hefur einkennst af dagskrá fjölskyldu-og menningarviku í Garðinum. Daglegir viðburðir hafa verið á dagskránni og hefur aðsókn verið ágæt. Dagskránni lýkur á sunnudaginn með bíósýningu í Samkomuhúsinu, þar sem myndin Bíódagar verður sýnd. Dagskrá vikunnar má finna á heimasíðu sveitarfélagsins, svgardur.is.

Fjölskyldu-og menningarvikan er haldin að frumkvæði Ferða-, safna-og menningarnefndar Garðs, sem annaðist undirbúning og skipulagningu dagskrár. Þetta er í fyrsta skipti sem slík dagskrá er skipulögð í Garðinum, en þess má vænta að þetta verði fastur liður í Garðinum á næstu árum.

Fundur í bæjarstjórn.

Í vikunni var fundur í bæjarstjórn Garðs. Að venju samanstóð dagskrá fundarins að mestu af fundargerðum bæjarráðs og nefnda sveitarfélagsins, ásamt fundargerðum nefnda og stjórna af sameiginlegum vettvangi sveitarfélaga. Á fundinum í þessari viku var fyrri umræða um fjárhagsáætlun 2016, en áætlunin verður til frekari vinnslu fram að síðari umræðu í bæjarstjórn í byrjun desember. Þegar þar að kemur verður gerð nánari grein fyrir fjárhagsáætlun hér í molum.

Hrekkjavökudiskó.

Við íslendingar erum oft opin fyrir nýjum siðum og förum gjarnan alla leið í þeim efnum. Færst hefur í vöxt að gera æ meira úr hinni amerísku „Hrekkjavöku“, sem löng hefð er fyrir í USA en Molar hafa ekki þekkingu á að útskýra hvað gengur út á og af hverju. Í síðustu viku var haldið hrekkjavökudiskó í Félagsmiðstöðinni Eldingu, þar sem nemendur 1. – 6. bekkjar Gerðaskóla mættu í gervi ýmissa kynjavera, dönsuðu og léku sér. Þetta var hin mesta og besta skemmtun fyrir krakkana og ekki síður fyrir foreldra og starfsfólk félagsmiðstöðvarinnar. Ekki fer sögum af því hvernig börnin sváfu um nóttina, eftir að hafa mætt alls konar misjafnlega ógnvekjandi verum á diskóinu !

Hér að neðan eru myndir af „Hrekkjavökudiskó“ í Eldingunni.

Kynjaverur á hrekkjavökudiskó í Eldingu
Kynjaverur á hrekkjavökudiskó í Eldingu
Ógnvekjandi verur á hrekkjavöku í Eldingu
Ógnvekjandi verur á hrekkjavöku í Eldingu
Ekki væri gott að mæta þessum í myrkri í Garðinum !
Ekki væri gott að mæta þessum í myrkri í Garðinum !

Góða helgi !

Facebooktwittergoogle_plusmail

Fjölskyldu-og menningarvika í Garði.

Þessa vikuna stendur yfir Fjölskyldu-og menningarvika hér í Garðinum.  Það var Ferða-, safna-og menningarnefnd Garðs sem undirbjó og skipulagði dagskrá vikunnar.  Á dagskrá eru viðburðir alla daga vikunnar og hefst hún í kvöld, mánudaginn 2. nóvember kl. 19:00 hjá Björgunarsveitinni Ægi.

Stofnanir sveitarfélagsins ásamt fleiri aðilum taka virkan þátt í dagskránni.  Frítt er í sund alla daga vikunnar og Byggðasafnið verður opið um næstu helgi.

Dagskrá Fjölskyldu-og menningarvikunnar er hér fyrir neðan og má sjá hana með því að smella á myndina.

Dagskrá Fjölskyldu-og menningarviku.
Dagskrá Fjölskyldu-og menningarviku.

Bæjarstjórinn hvetur Garðbúa og gesti til þess að fjölmenna á viðburði og njóta þess sem boðið er upp á.

Góða skemmtun !

 

 

 

 

Facebooktwittergoogle_plusmail

42. vika 2015.

Afmæli í dag.

Í dag á Íþróttamiðstöðin í Garði afmæli. Íþróttamiðstöðin var vígð og tekin í notkun þann 16. október 1993 og á því 22 ára afmæli í dag. Til hamingju með það Garðbúar og starfsfólk Íþróttamiðstöðvarinnar !

Bæjarráð.

Í vikunni var fundur í bæjarráði Garðs og voru ýmis mál á dagskrá fundarins. Eitt af hlutverkum bæjarráðs er að fjalla um fjármál sveitarfélagsins og fjárhagsáætlun, eftirlitshlutverk bæjarráðs er mikilvægt í þeim efnum. Á þessum fundi var fjallað um framgang fjárhagsáætlunar þessa árs, ásamt því að fjallað var um málefni sem tengjast fjárhagsáætlun næsta árs, sem er í vinnslu um þessar mundir. Meðal mála sem voru á dagskrá bæjarráðs voru málefni flóttamanna, en stjórnvöld hafa leitað til sveitarfélaga í landinu varðandi móttöku flóttafólks. Bæjarstjóri lagði fram minnisblað um hlutverk og skyldur sveitarfélaga, ríkisins, Rauða krossins og annarra aðila varðandi móttöku flóttamanna. Bæjarstjórn mun taka málið til frekari umfjöllunar á næsta fundi. Fyrir fundinum lá einnig erindi frá unglingaráðum Víðis og Reynis, þar sem fram kemur að félögin munu sameiginlega reka starfsemi fyrir unglinga í knattspyrnu á næsta ári. Loks má nefna að fyrir bæjarráði lá erindi frá Íbúðalánasjóði, sem býður sveitarfélaginu húseignir sjóðsins til kaups. Bæjarráð fól bæjarstjóra að afla nánari upplýsinga hjá sjóðnum, m.a. um það hvaða húseignir um er að ræða.

Garðskagi.

Nú er unnið að því að breyta starfsemi og þjónustu á Garðskaga. Fjölmargt ferðafólk sækir á Garðskaga á hverju ári, umferðin hefur aukist mjög allra síðustu ár og er útlit fyrir enn frekari aukningu samfara mikilli fjölgun ferðafólks sem sækir Ísland heim. Markmiðin eru að bæta aðstöðu, auka þjónustu og upplifun fyrir ferðafólk, allt í þeim tilgangi að mæta þörfum ferðafólks og skapa atvinnutækifæri í tengslum við það. Mikil undirbúningsvinna hefur staðið yfir, meðal annars samþykkti bæjarstjórn stefnumótun um þessi mál í byrjun þessa árs og hefur verið unnið eftir henni. Nánar verður gerð grein fyrir þessum málum síðar.

Af fundahöldum.

Starf bæjarstjóra einkennist að miklu leyti af alls konar fundahöldum um hin ýmsu málefni, ásamt því að mæta á fundi til þess að segja frá og kynna sitt sveitarfélag og þau verkefni sem unnið er að hverju sinni.

Nú í vikunni mættum við Ásgeir bæjarstjóri í Vogum á fund launafulltrúa sveitarfélaga á suð-vesturlandi, sem haldinn var í Eldborg í Svartsengi. Launafulltrúarnir fóru þar yfir ýmis mál á sviði launa og kjaramála sveitarfélaganna, með ýmsum sérfræðingum á því sviði. Svona yfirferð er mikilvæg, enda eru kjaramál starfsmanna sveitarfélaga margslungin og því mikilvægt fyrir launafulltrúa að hafa þau mál sem mest á hreinu. Hlutverk okkar Ásgeirs á fundinum var að kynna okkar sveitarfélög og segja frá því helsta sem unnið er að í okkar sveitarfélögum. Það var ánægjulegt að hitta þennan góða hóp og fá tækifæri til þess að kynna sveitarfélagið og segja frá því sem unnið er að í Garðinum.

Einn af fundum sem bæjarstjóri mætti á í vikunni var kynning Isavia á svokölluðu „Master Plani“ um framtíðarsýn uppbyggingar Keflavíkurflugvallar. Fjölgun farþega sem fara um flugvöllin er langt umfram bjartsýnustu spár síðustu ára. Á þessu ári munu hátt í 5 milljónir farþega fara um flugvöllinn, gera má ráð fyrir að talan fari yfir 6 milljónir árið 2016. Til samanburðar fóru rétt yfir 2 milljónir farþega um flugvöllinn árið 2010. Farþegafjöldinn á þessu ári er sá sem spáð hafði verið að yrði árið 2018. Mörgum finnast áætlanir Isavia byggja á bjartsýni, en horft er til áratuga fram í tímann og leitast við að horfa til uppbyggingar sem þarf að eiga sér stað til þess að mæta þeirri þróun sem er í gangi og gera má ráð fyrir að haldi áfram í einhverri mynd inn í framtíðina. Það er til fyrirmyndar að vinna svona áætlanir og mætti gjarnan gera það á mörgum fleiri sviðum hér á landi, þar sem rýnt er til framtíðar og leitast við að meta þróun mála og mæta henni tímanlega í stað þess að þurfa að „redda“ hlutunum þegar tiltekið ástand hefur skapast.

Íbúaþróun.

Það er áhugamál margra að fylgjast með íbúaþróun sveitarfélaga. Samkvæmt upplýsingum úr Þjóðskrá voru alls 1.432 íbúar skráðir með lögheimili í byrjun þessarar viku. Til samanburðar voru 1.425 íbúar skráðir með lögheimili í sveitarfélaginu þann 1. desember 2014. Íbúum hefur því fjölgað aðeins á þessu tæplega einu ári.

Kötlumót karlakóra.

Nú um helgina verður Kötlumót karlakóra haldið í Reykjanesbæ. Katla er Samband sunnlenskra karlakóra og munu karlakórar allt frá Höfn til Snæfellsness taka þátt í mótinu. Alls er áætlað að um 600 karlar munu koma saman og sameinast í kórsöng. Fjölmargir sértónleikar verða á nokkrum stöðum í Reykjanesbæ en kórarnir munu sameinast í einn stóran karlakór í Atlantic Studios á Ásbrú á síðdegis á laugardaginn. Gera má ráð fyrir að jarðskjálftamælar Veðurstofunar taki kipp þegar 600 manna karlakór beitir sér af krafti í lögum á við Brennið þið vitar !  Bæjarstjóri hvetur sem flesta til að mæta á tónleika Kötlumótsins. Þess má geta að Kötlumótið í ár er haldið af Karlakór Keflavíkur, en meðal þátttakenda er Söngsveitin Víkingar sem er m.a. skipuð söngglöðum körlum úr Garðinum.

Bleikur föstudagur.

Í dag föstudag mæta margir til sinna starfa með bleikan lit í sínum fatnaði. Það er til merkis um samstöðu og þátttöku í forvarnaátaki gegn krabbameinum, sem stendur yfir þennan mánuðinn. Starfsfólkið á bæjarskrifstofunni í Garði mætti að sjálfsögðu í bleiku í morgun, við gerðum það sem er margir gera og tókum eina „selfie“ mynd í tilefni dagsins. Þetta er skemmtilegt og setur svip á tilveruna.

Bleikur föstudagur
Bleikur föstudagur

Góða helgi !

 

 

Facebooktwittergoogle_plusmail