2. vika 2018.

Ferskir vindar.

Alþjóðlega listahátíðin Ferskir vindar hefur nú staðið yfir frá því fyrir jól hér í Garðinum. Um síðustu helgi var formleg opnunarhátíð þar sem Eliza Reid forsetafrú opnaði hátíðina, en hún er verndari hátíðarinnar. Listamenn sýna verk sín, halda tónleika og uppákomur víða um bæinn. Um komandi helgi verður lokaþáttur hátíðarinnar með sýningum og uppákomum á laugardag og sunnudag. Nánari upplýsingar um dagskrá má finna á heimasíðu sveitarfélagsins svgardur.is og á síðunni fresh-winds.com. Listahátíðin Ferskir vindar að þessu sinni starfar eftir þemanu DRAUMAR og má finna margt mjög áhugavert á dagskrá hátíðarinnar. Garðbúar og gestir eru hvattir til að njóta þeirrar dagskrár sem boðið er upp á um komandi helgi.

Eitt af þeim listaverkum sem hafa orðið til á listahátíðinni að þessu sinni, er verk sem Bjarni Sigurbjörnsson listmálari málaði á vegg í íþróttamiðstöðinni og setur verkið mikinn svip á íþróttamiðstöðina. Guðbrandur J Stefánsson tók þessa mynd af Bjarna við listaverkið, sem heitir Gleðigarður.

Skólahald á nýju ári.

Starfsemi skólanna er nú komin í sinn fasta farveg eftir jólafrí. Eitt af því sem nemendur Gerðaskóla og leikskólans Gefnarborgar hafa tekið sér fyrir hendur nú á nýju ári er samstarf við listamenn sem taka þátt í Ferskum vindum. Þetta samstarf er ánægjulegt og skapandi fyrir nemendur og má sjá þess merki í sýningum listamanna hátíðarinnar. Hér er mynd af efnilegum listmálurum í leikskólanum, sem unnu að sinni listsköpun undir áhrifum listamanna hjá Ferskum vindum. Myndin er fengin á Facebook síðu leikskólans Gefnarborgar.

Hér eru listamenn hjá Ferskum vindum í tónlistarsköpun með nemendum Gerðaskóla, myndin er af Facebook síðu Ferskra vinda, fresh winds in Gardur.

Lágmynd af heiðursborgara.

Þann 30. desember sl. var afhjúpuð lágmynd af Guðna Ingimundarsyni heiðursborgara Garðs, en Guðni varð 94 ára þann dag. Guðni afhjúpaði sjálfur lágmyndina, sem er steypt í brons og unnin af Ragnhildi Stefánsdóttur myndhöggvara. Hér má sjá Guðna virða fyrir sér sjálfan sig á lágmyndinni, mynd GJS.

Guðni á trukknum.

Á sunnudaginn nk. mun Guðmundur Magnússon kvikmyndagerðarmaður í Garði forsýna heimildamynd sem hann hefur unnið um Guðna Ingimundarson heiðursborgara og ber myndin heitið Guðni á trukknum. Sýningin verður í Miðgarði, sal Gerðaskóla og hefst kl. 14:00.

Veðrið.

Veðrið undanfarna daga hefur verið rysjótt. Gengið hefur á með hvössum suðlægum áttum með rigningu en hægara veður inn á milli. Á milli lægða hefur veður kólnað með tilheyrandi ísingu og hálku.

Góða helgi !

Facebooktwittergoogle_plusmail

1. vika 2018.

Gleðilegt og farsælt nýtt ár !

Ég óska íbúum sveitarfélagsins, starfsfólki þess og landsmönnum öllum farsældar á nýju ári, með þökk fyrir liðnu árin. Áramót eru alltaf sérstakur tímapunktur, þá leitar hugurinn yfir liðið ár og rifjað er upp það fjölmarga sem átti sér stað á árinu sem er að líða. Í mínum huga var árið 2017 að lang mestu leyti gott ár, bæði í einkalífinu og í ýmsum störfum sem unnin voru. Um áramótin hefst svo nýr og óskrifaður kafli lífsins og þá er spennandi að horfa fram á veginn, hvaða verkefni eru framundan og velta fyrir sér hvað nýtt ár ber í skauti sér.

Ef litið er yfir liðið ár 2017, þá hefur margt átt sér stað og unnið var að mörgum verkefnum á vettvangi sveitarfélagsins. Árið var annasamt og um margt gjöfult, segja má að Suðurnesin og þar með Sveitarfélagið Garður hafi verið heitasta svæði landsins ef litið er til aukinna umsvifa í atvinnulífi og íbúaþróunar. Íbúum sveitarfélagsins fjölgaði mikið á árinu 2017, í upphafi árs voru um 1.500 íbúar í Garði en í lok árs rétt innan við 1.600. Nýir íbúar eru boðnir velkomnir í Garðinn, með von um gott samstarf og að þeim líði vel í samfélaginu okkar.

Unnið var að ýmsum framkvæmdar verkefnum hjá sveitarfélaginu og má þar m.a. nefna úrbætur á aðstöðu og húsnæði tónlistarskólans, malbikun gatna, stækkun kirkjugarðs og umhverfisverkefni að Útskálum, fráveituverkefni o.fl. Þá var úthlutað lóðum fyrir íbúðarhús og hófust framkvæmdir á árinu 2017, en nokkur ár eru síðan síðast var unnið að uppbyggingu íbúðarhúsnæðis í Garði. Þá urðu þau sögulegu tíðindi í nóvember að íbúar sveitarfélaganna Garðs og Sandgerðisbæjar samþykktu að sveitarfélögin verði sameinuð.

Straumur ferðafólks hélt áfram að aukast á árinu 2017, en áætlað er að hátt í 300 þúsund gestir heimsæki Garðskaga á ári. Fyrri hluta ársins var opnað nýtt og glæsilegt hótel, Hotel Lighthouse Inn og haldið var áfram þróun og uppbyggingu ferðaþjónustu á Garðskaga.

Að venju voru ýmsir viðburðir á árinu, má þar nefna árlegt þorrablót þar sem hátt í 700 gestir skemmtu sér og nutu þorramatar. Kvenfélagið Gefn fagnaði 100 ára afmæli félagsins undir lok árs 2017 og Söngsveitin Víkingar sló í gegn bæði innanlands og í söngferð til Norðurlanda. Knattspyrnulið Víðis stóð sig vel síðasta sumar, litlu munaði að liðið færðist upp í 1. deild en vonandi næst sá áfangi á komandi leiktíð. Félags-og menningarlíf í Garði er fjölbreytt og kröftugt, nánast einhverjir viðburðir í hverri viku ársins.

Framundan eru mörg verkefni sem þarf að vinna að á vettvangi sveitarfélagsins. Árið 2018 verður nokkuð sérstakt og viðburðaríkt, þar sem í maí verða sveitarstjórnarkosningar og þá mun taka gildi sameining sveitarfélaganna Garðs og Sandgerðisbæjar. Fram að sameiningunni verður unnið að fjölmörgum verkefnum til að undirbúa starfsemi sameinaðs sveitarfélags, það er í senn krefjandi en umfram annað spennandi verkefni. Eitt megin markmið þessarar vinnu verður að halda áfram að byggja upp góða þjónustu við íbúana og að nýtt sameinað sveitarfélag verði eftirsótt til búsetu.

Í stækkandi sveitarfélagi með fjölgun íbúa þarf að huga að innviðum og þjónustunni við íbúana. Á þessu ári verður m.a. hugað að stækkun og bættri aðstöðu leikskólans, þar sem núverandi leikskóli er fullnýttur og búa þarf í haginn til að öll börn geti notið leikskólavistar. Jafnframt þarf að hefja undirbúning að stækkun grunnskólans, vegna fjölgunar nemenda skólans á næstu árum. Á síðasta ári var unnið að deiliskipulagi í tveimur íbúðarsvæðum, þeirri skipulagsvinnu verður lokið nú fyrri hluta ársins og verður hafin úthlutun íbúðarlóða, en eftirspurn er eftir lóðum fyrir íbúðarhúsnæði. Það má því búast við að á þessu ári hefjist framkvæmdir við frekari uppbyggingu íbúðarhúsnæðis og þar með fjölgun íbúa.

Í samstarfi við önnur sveitarfélög á Suðurnesjum verður haldið áfram að vinna að mörgum spennandi og mikilvægum verkefnum. Má þar m.a. nefna þróun og uppbyggingu atvinnu-og athafnasvæðis í nágrenni Keflavíkurflugvallar, sem er spennandi framtíðar verkefni.

Hér hefur verið stiklað á stóru þegar litið er til liðins árs og helstu verkefna sem framundan eru á nýju ári. Fjölmargt fleira væri vert að nefna, en í vikulegum Molum er leitast við að fjalla um það helsta sem á sér stað í sveitarfélaginu og verður því haldið áfram á nýju ári.

Ferskir vindar.

Nú stendur yfir hin alþjóðlega listahátíð Ferskir vindar í Garði. Hátíðin er nú haldinn í fimmta sinn og er þema hátíðarinnar að þessu sinni DRAUMAR. Það hefur verið áhugavert að fylgjast með listsköpun listamannanna undanfarið. Hér eru nú staddir listamenn frá nokkrum löndum og er listsköpun þeirra mjög fjölbreytileg. Á morgun, laugardaginn 6. janúar verður formleg opnun hátíðarinnar, með listasýningum og uppákomun. Sýningar verða opnar nú á laugardag og sunnudag, einnig laugardag og sunnudag eftir viku. Garðbúar og gestir eru hvattir til að mæta og njóta þeirra listviðburða sem í boði eru þessa daga.

Góða helgi.

 

Facebooktwittergoogle_plusmail

52. vika 2017.

Nú árið er liðið…

Nú líður að því að við kveðjum árið 2017. Þegar litið er til baka yfir árið, þá hefur þetta verið gott ár. Alltaf er þó svo að finna megi eitthvað sem betur mátti fara, eða rifja upp ýmislegt sem varpar skugga á með einhverjum hætti. En, þegar dæmið er gert upp er niðurstaðan sú að árið hefur verið farsælt og gott.

Ég þakka starfsfólki og kjörnum bæjarfulltrúum sveitarfélagsins fyrir ánægjulegt og gott samstarf á árinu sem er að líða. Einnig íbúum sveitarfélagsins fyrir góð samskipti og ánægjulega samfylgd. Mörgum fleirum er vert að þakka fyrir samstarf og samfylgd á árinu. Með þessum síðustu molum úr Garði á þessu ári er landsmönnum öllum sendar góðar áramótakveðjur með þökk fyrir árið sem er að líða.

Áramótabrenna og flugeldasýning.

Á gamlárskvöld verður að venju áramótabrenna í Garðinum. Eldur verður lagður að brennunni kl. 20:30 og flugeldasýning verður um kl. 21:00. Það eru Björgunarsveitin Ægir og Kiwanisklúbburinn Hof sem sjá um framkvæmd, en flugeldasýningin er í samstarfi við sveitarfélagið.

Flugeldasala björgunarsveitarinnar.

Eins og undanfarin ár verður Björgunarsveitin Ægir með flugeldasölu nú fyrir áramótin. Ágóði af flugeldasölunni fer til að fjármagna starfsemi björgunarsveitarinnar og eru allir þeir sem ætla að fjárfesta í flugeldum hvattir til að versla við björgunarsveitina. Eins og mörg dæmi sanna eru sjálfboðaliðar björgunarsveitanna öllum stundum tilbúnir til að bregðast við ef á þarf að halda. Með því að kaupa flugeldana hjá björgunarsveitinni styðjum við starfsemi þeirra, sem er okkur öllum mikilvægt.

Jólatrésskemmtun Gefnar.

Á morgun, laugardaginn 30. desember heldur Kvenfélagið Gefn sína árlegu jólatrésskemmtun og hefst hún kl. 15:00 í Miðgarði, sal Gerðaskóla. Aðgangur er ókeypis og eru fjölskyldur hvattar til að mæta, njóta samveru og skemmtunar.

Nýtt ár heilsar. 

Framundan eru áramót og er sá tímapunktur um margt sérstakur. Litið er til baka yfir farinn veg og liðið ár gert upp. Framundan er nýtt ár og þar með óskrifuð framtíð. Það er alltaf jafn spennandi að horfa fram í tímann og reyna að gera sér í hugarlund hvað nýtt ár muni bera í skauti sér. Árið 2018 mun fela í sér margar áskoranir og spennan felst í óvissunni um marga hluti. Vonandi verður nýtt ár okkur öllum farsælt og til heilla.

Gleðilegt og farsælt nýtt ár, allir hvattir til að fara varlega með skotelda um áramótin !

Facebooktwittergoogle_plusmail

51. vika 2017.

Jólafrí.

Nú eru nemendur og starfsfólk Gerðaskóla komin í jólafrí, litlu jólin voru í vikunni og eftir það jólafrí fram yfir áramótin. Í leikskólanum Gefnarborg er einnig ríkjandi jólaandi. Nú í vikunni heimsótti sóknarpresturinn börnin í leikskólanum og fræddi þau um jólin og það sem þeim tengjast. Eitthvað sást til jólasveina í báðum skólunum. Þá voru jólatónleikar tónlistarskólans í lok síðustu viku, þar sem nemendur fluttu jólalög. Jólaandinn svífur yfir Garðinum.

Ferskir vindar.

Nú er listahátíðin Ferskir vindar hafin. Listamenn eru á fullu í sinni vinnu og verður spennandi að sjá og upplifa listsköpun þeirra.

Jólatrésskemmtun.

Árleg jólatrésskemmtun Kvenfélagsins Gefnar verður í Gerðaskóla laugardaginn 30. desember. Kvenfélagið hefur árum saman staðið fyrir jólatrésskemmtunum fyrir Garðbúa. Að venju er aðgangur gjaldfrjáls.

 

Molar óska Garðbúum og landsmönnum öllum gleðilegra jóla.

 

Facebooktwittergoogle_plusmail

50. vika 2017.

Skötuveisla Víðis í dag.

Að venju býður Unglingaráð Knattspyrnufélagsins Víðis upp á skötuveislu fyrir Jól. Í dag og fram á kvöld verður skötuilmur við samkomuhúsið, en eflaust mæta margir til að fá sér skötu í hádeginu í dag og í kvöldmat í kvöld. Garðbúar eru hvattir til að mæta í skötuna hjá Víði, enda ómissandi rétt fyrir Jól.

Jólastemmning í Gerðaskóla.

Í hádeginu í dag, föstudag var hangikjötsveisla og samvera nemenda og starfsfólks með jólalegu ívafi. Nemendur og starfsfólk voru í klæðnaði sem tengist jólahátíðinni, góð stemmning og jólaandi. Miðgarðsbandið skipað kennurum spilaði jólalög og viðstaddir tóku undir með söng. Ýmsar viðurkenningar og verðlaun voru veitt fyrir verkefni tengd jólum, þar á meðal fyrir jólalegustu hurð að kennslustofu, sem féll í skaut 6. bekkjar.  Skemmtileg og í senn hátíðleg stund sem ánægjulegt var að upplifa. Hér eru myndir frá hádeginu í Gerðaskóla.

Þetta er verðlauna jólahurð Gerðaskóla 2017, stofa 6. bekkjar.

Ferskir vindar.

Listahátíðin Ferskir vindar hefst nú um helgina og mun standa fram undir lok janúar. Hátíðin setur jafnan skemmtilegan svip á bæjarlífið, fjöldi listamanna af ýmsu tagi taka þátt og koma þeir margir erlendis frá en einnig taka þátt íslenskir listamenn. Það verður áhugavert og skemmtilegt að fylgjast með og upplifa þessa einstöku listahátíð, sem hefur víða vakið athygli og fengið viðurkenningar. Mireya Samper er helsti forsprakki hátíðarinnar, sem er samstarfserkefni Ferskra vinda og sveitarfélagsins.

Norðurljós á Garðskaga.

Undanfarið hafa hópar erlendra ferðamanna komið á Garðskaga seint um kvöld til að njóta norðurljósa. Skilyrði til að upplifa norðurljósin hafa verið ágæt og er jafnan gaman að fylgjast með upplifun erlendu ferðamannanna þegar þeir sjá norðurljósin í fyrsta skipti. Þeir taka jafnan mikið af myndum, enda eru norðurljósin fallegt myndefni. Hér er mynd sem Jóhann Ísberg tók fyrir nokkrum kvöldum af norðurljósum og gamla vitanum á Garðskaga.

Undirbúningur að sameiningu sveitarfélaga.

Samkvæmt sveitarstjórnarlögum hafa bæjarstjórnir Garðs og Sandgerðisbæjar nú skipað fulltrúa sína í sérstaka stjórn til undirbúnings sameiningu sveitarfélaganna. Þetta er næsta skref í málinu eftir að íbúar samþykktu í atkvæðagreiðslu að sveitarfélögin verði sameinuð. Stjórnin mun á næstu vikum og mánuðum vinna að undirbúningi sameiningar sveitarfélaganna, sem mun taka gildi eftir sveitarstjórnarkosningar í lok maí 2018.

Framkvæmdir á Aðventu.

Nú um Aðventu standa yfir ýmsar framkvæmdir í Garði. Sem dæmi standa yfir framkvæmdir við byggingu íbúðarhúsa, slíkar framkvæmdir hafa ekki verið algengar mörg undanfarin ár en eru hafnar á ný og má reikna með að fjör færist í leikinn á næsta ári við byggingu íbúðarhúsnæðis í Garði. Þá eru framkvæmdir við húsnæði tónlistarskólans á lokaspretti og verður húsnæðið væntanlega tilbúið um miðjan janúar. Þá mun tónlistarskólinn búa við mjög góða aðstöðu, sem vonast er til að efli tónlistarlífið í Garði enn frekar. Hér er mynd af byggingu íbúðarhúss við Vörðubraut, tekin nú í morgunsárið.

 

Jólahátíð nálgast.

Nú er aðeins rúm vika til Jóla. Bærinn er kominn í jólabúning með ljósaskreytingar á húsum víða í bænum. Nemendur og starfsfólk í skólum fara í jólafrí í næstu viku og spennan fyrir jólunum eykst dag frá degi. Árleg jólatrésskemmtun Kvenfélagsins Gefnar verður síðan milli Jóla og nýárs í Gerðaskóla.  Næstu vikuna verður væntanlega helsta spurningin, verða rauð eða hvít jól? Það kemur í ljós, en veðurútlit næstu daga ber ekki með sér von um snjókomu.

Veðrið.

Undanfarna vikuna hefur verðrið nánast leikið við okkur í Garðinum. Flesta daga hafa verið norðlægar áttir með hægviðri og sólar hefur notið við þann hluta daganna sem bjart er. Í næstu viku þann 21. desember verða vetrarsólstöður, eftir það fer daginn að lengja aftur hægt og bítandi og myrkasta skammdegið lætur undan síga.

Góða helgi !

 

Facebooktwittergoogle_plusmail

49. vika 2017.

Nokkuð er síðan Molar úr Garði birstust síðast. Fyrir því eru ýmsar ástæður, m.a. það að bæjarstjórinn fór í stutt frí í nóvember og svo gerðist það að síðan lá niðri vegna bilunar hjá hýsingaraðila. En nú er þráðurinn tekinn upp að nýju.

Aðventan.

Nú er Aðventan gengin í garð og óðum styttist í Jól. Mikið var um að vera í Garði sl. sunnudag, sem var sá fyrsti í Aðventu. Messa var í Útskálakirkju, Kvenfélagið Gefn hélt sinn árlega jólabasar og jólamarkaður var í byggðasafninu á Garðskaga. Góð þátttaka var í öllum viðburðum dagsins, enda alltaf ákveðin hátíðarstemmning þegar Aðventa gengur í garð.

Síðast en ekki síst voru ljósin tendruð á jólatrénu í miðbænum fyrsta sunnudag í Aðventu, samkvæmt venju.  Dagskrá var með hefðbundnu sniði með kærleikshugvekju, söng og jólasveinum. Að venju sá yngsti nemandi Gerðaskóla um að tendra ljósin, að þessu sinni var það hann Magnús Máni Guðnason. Þá buðu drengir í 4. flokki Reynis/Víðis upp á heitt súkkulaði og piparkökur. Fjölmenni mætti, enda var veður einstaklega gott og aðstæður eins og best verður á kosið.

Bæjarstjórn.

Í vikunni var síðasti fundur á þessu ári hjá bæjarstjórn. Fjárhagsáætlun fyrir árið 2018 var afgreidd og tilnefndir voru fulltrúar í stjórn til undirbúnings að stofnun nýs sveitarfélags við sameiningu Garðs og Sandgerðisbæjar. Bæjarstjórn samþykkti verklagsreglur við úthlutun byggðakvóta og auk þess voru ýmsar fundargerðir nefnda, ráða og stjórna á dagskrá. Afgreiðsla bæjarstjórnar á fjárhagsáætlun að þessu sinni markaði nokkur tímamót. Annars vegar er þetta síðasta fjárhagsáætlun sem núverandi bæjarstjórn vinnur og afgreiðir þar sem kjörtímabili bæjarstjórnar lýkur í maí á næsta ári. Hins vegar er þetta síðasta fjárhagsáætlun sem afgreidd er í nafni Sveitarfélagsins Garðs, þar sem sveitarfélagið mun sameinast Sandgerðisbæ við næstu sveitarstjórnarkosningar. Nánari upplýsingar um fjárhagsáætlun eru á heimasíðunni svgardur.is.

Kvenfélagið Gefn 100 ára.

Á morgun, laugardag heldur Kvenfélagið Gefn afmælishátíð í tilefni þess að liðin eru 100 ár frá stofnun kvenfélagsins. Saga kvenfélagsins í 100 ár er um margt merkileg og athyglisverð, félagið hefur allan þennan tíma haldið úti öflugu starfi og lagt mikið af mörkum í þágu samfélagsins og fólksins í Garði. Innilega til hamingju kvenfélagskonur, með þennan merka áfanga í starfi Kvenfélagsins Gefnar.

Hangikjötsveisla Víðis.

Í hádeginu í dag bauð Víðir sínum stuðningsaðilum í hádegismat í Víðishúsinu, þar sem boðið var upp á dýrindis hangikjöt og meðlæti. Fjölmenni mætti og naut matarins, enda býr Víðir vel að mörgum og öflugum stuðningsaðilum. Takk fyrir og áfram Víðir.

Veðrið.

Veðrið undanfarna viku hefur verið með besta móti. Að mestu hægviðri en nokkuð svalt, að vísu kom norðan skot með vindi einn sólarhring. Þegar þetta er skrifað á föstudegi er hægviðri og sól, en frostið er um 6 gráður.

 

 

Facebooktwittergoogle_plusmail

45. vika 2017.

Kosningar um sameiningu sveitarfélaga.

Á morgun laugardaginn 11. nóvember fer fram atkvæðagreiðsla meðal íbúa Garðs og Sandgerðisbæjar, um það hvort sveitarfélögin sameinist. Undanfarna tvo mánuði hefur málið verið kynnt. Ýmsum gögnum og upplýsingum hefur verið komið á framfæri við íbúa, á sérstakri upplýsingasíðu og á heimasíðum sveitarfélaganna, á Facebook síðu, dreift hefur verið kynningarbæklingum og öðru efni í hvert hús, loks voru haldnir íbúafundir í báðum sveitarfélögum í upphafi þessarar viku. Nú er komið að því að íbúarnir taka ákvörðun um hvort af sameiningu verður eða hvort sveitarfélögin halda áfram starfsemi eins og nú er. Kjósendur eru eindregið hvattir til að taka þátt í atkvæðagreiðslunni, það er mikilvægt að sem flestir taki þátt. Kjörfundur í Garði verður í Gerðaskóla milli kl. 9:00 og 22:00 á morgun. Á sama tíma verður kjörfundur í Grunnskólanum í Sandgerði.

Eftir að kjörfundi lýkur kl. 22:00 annað kvöld munu kjörstjórnir á hvorum stað telja atkvæðin. Gert er ráð fyrir að niðurstöður liggi fyrir um eða upp úr kl. 23:00. Formenn kjörstjórna munu síðan tilkynna niðurstöður og verða Víkurfréttir með beina útsendingu frá því á vf.is

Bæjarráð.

Bæjarráð fundaði í vikunni. Fjallað var um fjárhagsáætlun næsta árs og farið yfir framkvæmdir á þessu ári. Í tilefni þess að sl. sunnudag urðu Suðurnesin öll meira og minna rafmagnslaus, ályktaði bæjarráð um óöruggt flutningskerfi raforku á svæðið. Aðeins ein flutningslína sér Suðurnesjum fyrir raforku, sem felur í sér mikið óöryggi enda hefur allt of oft orðið rafmagnslaust á öllum Suðurnesjum þegar bilun verður í þessu einfalda flutningskerfi. Bæjarráð beinir því til stjórnvalda og Landsnets að hið allra fyrsta verði ráðist í framkvæmdir við aðra flutningslínu, svonefnda Suðurnesjalínu 2 enda geta íbúar og atvinnufyrirtæki, þar á meðal alþjóðaflugvöllurinn, ekki búið við þetta óöryggi öllu lengur.

Ný deiliskipulög.

Í byrjun vikunnar voru auglýst tvö deiliskipulög fyrir íbúðarhverfi í Garðinum. Nokkur eftirspurn hefur verið eftir íbúðarlóðum og er von til þess að uppbygging íbúðarhúsnæðis fari á fulla ferð þegar deiliskipulögin hafa verið staðfest og lóðir tilbúnar til úthlutunar.

Herrakvöld Víðis.

Annað kvöld, laugardagskvöld verður herrakvöld Víðis. Þessi herrakvöld eru orðin víðfræg, enda kraftur í Víðismönnum og er víst að á morgun verði mikil gleði og skemmtilegheit á herrakvöldinu.

Handverk í Auðarstofu.

Á morgun laugardag verður handverkssýning og kaffisala í Auðarstofu að Heiðartúni 2, þar sem félagsstarf aldraðra og öryrkja hefur starfsaðstöðu. Opið verður milli kl. 13:00 og 17:00 og eru Garðbúar og gestir hvattir til að líta við í Auðarstofu.

Góða helgi !

 

Facebooktwittergoogle_plusmail

44. vika 2017.

Bæjarstjórn.

Bæjarstjórn fundaði í vikunni og voru að venju mörg og mismunandi mál á dagskrá. Fram fór fyrri umræða um fjárhagsáætlun, en áætlunin hefur ekki tekið á sig endanlega mynd og verður áfram til vinnslu fram að síðari umræðu í byrjun desember. Bæjarstjórn samþykkti húsnæðisáætlun sveitarfélagsins og hefur hún verið birt á heimasíðunni, en Garður er í hópi nokkurra sveitarfélaga sem hafa samþykkt húsnæðisáætlanir. Þá samþykkti bæjarstjórn að auglýsa breytingu á aðalskipulagi sveitarfélagsins, sem og breytingu á deiliskipulagi Teiga-og Klapparhverfis og nýtt deiliskipulag íbúðarhverfis sunnan Skagabrautar í Útgarði. Að öðru leyti fjallaði bæjarstjórn um ýmsar fundargerðir nefnda og ráða.

Malbikun Garðvegar.

Slæmt ástand Garðvegar hefur valdið bæjaryfirvöldum og íbúum áhyggum og óþægindum að undanförnu, enda var ástand vegarins beinlínis orðið að slysagildru. Fulltrúar sveitarfélagsins hafa verið í samskiptum við Vegagerðina undanfarin ár vegna þessa og þá sérstaklega nú á þessu ári. Þá hafa íbúar í Garði einnig lagt sitt af mörkum við að vekja athygli á slæmu ástandi vegarins. Það er því fagnaðarefni að nú í vikunni réðst Vegagerðin í að malbika hluta vegarins. Vegagerðin fær þakkir fyrir þetta framtak, nú geta vegfarendur ekið á rennisléttu og nýju malbiki á stórum hluta Garðvegar. Þótt svo vegurinn sé orðinn sléttur og fínn, þá eru vegfarendur hvattir til varúðar í umferðinni.

          

Sameining sveitarfélaga.

Nú líður óðum að atkvæðagreiðslu íbúa þann 11. nóvember, um tillögu um sameiningu Garðs og Sandgerðisbæjar. Nú í vikunni var dreift kynningarefni í öll hús í sveitarfélögunum, viðtal var við forseta bæjarstjórna sveitarfélaganna í Víkurfréttum, í gærkvöldi var kynningarfundur á vegum Ungmennaráðs í Garði og framundan eru íbúafundir um málið. Íbúafundur verður í Gerðaskóla á mánudaginn kl. 20 og í Grunnskólanum í Sandgerði á þriðjudag kl. 20. Þá er sem fyrr kynningarefni og upplýsingar að finna á vefsíðum sveitarfélaganna og á upplýsingasíðunni sameining.silfra.is. Þar að auki er opin síða á Facebook með upplýsingum. Íbúar eru hvattir til að kynna sér málið og umfram allt mæta á kjörstað laugardaginn 11. nóvember og taka þátt í atkvæðagreiðslunni. Atkvæðagreiðsla utan kjörfundar er hjá sýslumönnum og sendiráðum erlendis.

Snyrstistofan Vallý í Garði.

Fyrir stuttu var opnuð Snyrtistofan Vallý í Sunnubraut 4 í Garði. Snyrtistofan er í eigu Valgerðar Einarsdóttur snyrtifræðings og býður hún upp á ýmiskonar snyrtiþjónustu. Við fögnum opnun nýrrar starfsemi og óskum Vallý góðs gengis.

Framtíðarsýn fyrir Suðurnes.

Nú í vikunni var á vegum Isavia, Kadeco og Sambands sveitarfélaga á Suðurnesjum unnið að framtíðarsýn fyrir Suðurnesin til ársins 2040. Unnið var út frá aðferðafræði sviðsmyndagreininga og var verkefninu stýrt af sérfræðingum KPMG. Svona verkefni eru alltaf áhugaverð og fá þátttakendur til þess að hugsa fram í tímann, velta fyrir sér tækifærum og mögulegri þróun mála til framtíðar ásamt því að opna sýn á hvað þarf að gerast til þess að tilteknar sviðsmyndir verði að veruleika. Mikil og hröð þróun hefur verið á Suðurnesjum síðustu misseri og ár og er líklegt að á því verði framhald næstu árin. Það er því mikilvægt að reyna að sjá ýmsa hluti fyrir og taka ákvarðanir bæði til að bregðast við hraðri þróun og ekki síður til þess að undirbúa að mæta þróuninni. Við á Suðurnesjum stöndum frammi fyrir ögrandi og spennandi verkefnum og þessar framtíðar pælingar eru sannarlega mikilvægar í því samhengi.

Mánaðaskipti.

Nú hefur október runnið sitt skeið á enda og nóvember runninn upp. Árið styttist í annan endann og fyrr en varir renna upp áraskipti. Veðurfarið hefur verið þokkalegt og lítið ennþá farið fyrir kuldatíð sem oft fylgir þessum árstíma. Milt veður hefur komið sér vel varðandi ýmis verkefni og framkvæmdir, sem hefur verið unnið að undanfarið eins og um sumartíma væri að ræða. Sem dæmi um það voru malbikunar framkvæmdir á Garðvegi nú í vikunni.

Góða helgi !

 

Facebooktwittergoogle_plusmail

43. vika 2017.

Bæjarráð

Bæjarráð fundaði í vikunni. Af ýmsum málum sem voru á dagskrá fundarins má nefna að drög að fjárhagsáætlun voru til umfjöllunar, vinnu við fjárhagsáætlun er ekki lokið en hún kemur til fyrri umræðu í bæjarstjórn í næstu viku. Þá ályktaði bæjarráð um mögulega gjaldtöku á áningarstöðum fyrir ferðamenn, mál sem hefur verið til umfjöllunar á vettvangi Reykjanes Jarðvangs. Bæjarráð lítur svo á að gjaldtaka komi til greina en líta þurfi m.a. til eðlilegs aðgengis íbúa ef um er að ræða áningarstaði sem eru hluti af þéttbýli. Loks má nefna að bæjarráð samþykkti samhljóða verkefnaáætlun um samstarfsverkefni sveitarfélaganna Garðs, Sandgerðisbæjar og Reykjanesbæjar með Kadeco og Isavia varðandi atvinnu-og þróunarsvæði á Miðnesheiði í við Keflavíkurflugvöll.

Lýðheilsugöngur

Nú í september stóð Ferðafélag Íslands fyrir lýðheilsugöngum í samstarfi við sveitarfélög í landinu. Dagskráin var í tilefni 90 ára afmælis ferðafélagsins. Ýmsir aðilar og félagasamtök tóku að sér að skipuleggja og leiða fimm lýðheilsugöngur í Garði. Nú í vikunni bauð lýðheilsufulltrúi sveitarfélagsins þessum aðilum í stutta samveru á bæjarskrifstofunni og þakkaði fyrir þeirra þátt í lýðheilsugöngunum, afhenti þakkargjöf frá Ferðafélagi Íslands og tók þessa mynd af því tilefni. Sveitarfélagið þakkar skipuleggjendum og fararstjórum ganganna fyrir þeirra framlag. Einnig er þakkað skemmtilegt frumkvæði Ferðafélags Íslands og samstarf um þessar lýðheilsugöngur, en mjög góð þátttaka var í þeim af íbúum sveitarfélagsins.

Sameining sveitarfélaga – íbúafundir og kynningarefni

Nú eru tvær vikur þar til íbúar sveitarfélaganna Garðs og Sandgerðisbæjar greiða atkvæði um hvort sveitarfélögin sameinast eða ekki. Í næstu viku verður dreift kynningarefni og upplýsingum í öll hús í sveitarfélögunum báðum. Mánudaginn 6. nóvember verður íbúafundur um málið í Gerðaskóla í Garði og þriðjudaginn 7. nóvember í Grunnskólanum í Sandgerði. Þar verður farið yfir málið og íbúum gefst kostur á að afla sér upplýsinga. Á heimasíðum sveitarfélaganna; svgardur.is og sandgerdi.is má fara inn á upplýsingasíðuna sameining.silfra.is, þar sem eru upplýsingar um málið og þar má finna skýrslu KPMG sem inniheldur miklar upplýsingar. Auk þess er bent á Facebook síðuna Kosningar um sameiningu Sandgerðis og Garðs, þar sem eru einnig ýmsar upplýsingar.  Íbúar eru hvattir til að kynna sér málið og taka þátt í atkvæðagreiðslunni þann 11. nóvember.

Alþingiskosningar á morgun

Á morgun, laugardaginn 28. október fara fram kosningar til Alþingis. Kjósendur eru hvattir til að mæta á sína kjörstaði og njóta þeirra forréttinda að taka þátt í lýðræðislegum kosningum. Vonandi verða niðurstöður kosninganna þjóðinni til heilla.

Október að líða hjá !

Sem fyrr líður tíminn hratt áfram og nú er komið að lokum október mánaðar! Við njótum þess að ennþá hefur lítið borið á haustveðrum og þaðan af síður hefur orðið kuldatíð með éljum og snjókomu, eins og oft hefur verið á þessum árstíma. Víða er ennþá unnið að verkefnum sem að öllu jöfnu tilheyra sumrinu, svo sem jarðvinnu og ýmsum framkvæmdum. Nóvember er handan við hornið og ekki er laust við að einhverjir séu þegar farnir að undirbúa komu Jóla.

Góða kosningahelgi !

 

 

Facebooktwittergoogle_plusmail

42. vika 2017.

Þessi vika einkenndist eins og flestar aðrar vikur hjá bæjarstjóranum af mikilvægum verkefnum á bæjarskrifstofunni, þar sem nú stendur hæst lokasprettur við gerð fjárhagsáætlunar fyrir næsta ár. Fyrri umræða um fjárhagsáætlun fer fram í bæjarstjórn 1. nóvember. Þá voru í vikunni ýmsir mikilvægir og áhugaverðir fundir, þar sem fjallað var um brýn málefni.

Húsnæðisþing.

Fyrsta Húsnæðisþing Íbúðalánasjóðs var haldið á mánudaginn. Þar voru húsnæðismálin í víðum skilningi til umræðu og var þingið vel heppnað. Meðal annars voru til umfjöllunar húsnæðisáætlanir sveitarfélaga, en við í Garði erum í hópi nokkurra sveitarfélaga sem höfum lokið við vinnslu húsnæðisáætlunar. Undirritaður tók þátt í pallborðsumræðu um húsnæðisáætlanir sveitarfélaga, sem eru gott stjórntæki til stefnumótunar.

Samtök atvinnulífsins.

Á miðvikudag var hádegisfundur Samtaka atvinnulífsins, þar sem farið var yfir vinnumarkaðsmál og efnahagsmál almennt. Við höfum nú lifað eitt lengsta samfellda hagvaxtarskeið í sögu þjóðarinnar og erum líklega á hápunkti hagsveiflunnar. Framundan eru mikilvægar ákvarðanir og kjarasamningar sem munu hafa afgerandi áhrif á efnahag þjóðarinnar næstu misseri og ár. Vonandi tekst vel til í þeim efnum, en hættan er sú að við lendum í enn einni niðursveiflunni með tilheyrandi efnahagslegum áföllum, sem eins og venjulega munu fyrst og fremst bitna á almenningi. Þetta var áhugaverður og upplýsandi fundur.

Sameiningarmál í Auðarstofu.

Það líður óðum að atkvæðagreiðslu íbúa Garðs og Sandgerðis um það hvort sveitarfélögin sameinast. Á miðvikudag var undirritaður á mjög góðum fundi í Auðarstofu, þar sem er félagsstarf aldraðra og  öryrkja. Þar var farið yfir helstu niðurstöður og upplýsingar um hugsanlega sameiningu og urðu góðar og fjörlegar umræður. Fundurinn var góður og málefnalegur, eðlilega eru skiptar skoðanir en aðal málið er að íbúar afli sér upplýsinga, taki afstöðu og taki síðan þátt í atkvæðagreiðslunni 11. nóvember.

Fjárveitingar til stofnana á Reykjanesi.

Að frumkvæði Reykjanesbæjar var áhugaverður fundur á fimmtudag, þar sem farið var yfir fjárveitingar ríkisins til stofnana og þjónustu á Suðurnesjum. Þar komu fram mjög sláandi upplýsingar um það hvað Suðurnesin eru vanhaldin af fjárveitingum miðað við aðra landshluta, sérstaklega ef litið er til þess hvað íbúum á svæðinu hefur fjölgað mikið undanfarin 2-3 ár og hve gríðarleg aukning hefur verið í umferð um Keflavíkurflugvöll. Það er nánast sama hvert er litið í þessum efnum og er alger og skýr krafa um að þetta verði leiðrétt. Íbúar á Suðurnesjum geta ekki lengur búið við það að vera skör lægra settir en samlandar okkar á öðrum landsvæðum. Á fundinum voru mættir frambjóðendur til Alþingis og fengu þessar staðreyndir beint í æð. Þeir sem ná kjöri eiga mikið verk fyrir höndum við að bæta hag Suðurnesjamanna.

Nemendaráð Gerðaskóla.

Eins og alltaf kjósa nemendur Gerðaskóla fulltrúa sína í nemendaráð fyrir skólaárið. Nemendaráðið hefur mikilvægu hlutverki að gegna, sérstaklega varðandi félagslíf nemenda. Hér er mynd af nýju nemendaráði í Gerðaskóla.

Sem fyrr er tíminn fljótur að líða, október mánuður líður hratt og öruggt áfram. Framundan eru alþingiskosningar og síðan atkvæðagreiðsla íbúa sveitarfélagsins 11. nóvember um það hvort verður af sameiningu Garðs og Sandgerðisbæjar. Íbúar eru hvattir til að kynna sér upplýsingar um málið á heimasíðu sveitarfélagsins, svgardur.is.

Góða helgi !

 

 

Facebooktwittergoogle_plusmail